DILI, STLTIMORLESTE.com – Tribunal Judisial Primera Instansia Dili iha loron Kinta nee la konsege halao julgamentu ba Abertura Debate Instrutoriou neebe rekere husi Mari Alkatiri.
Tuir Juiz Prosesu katak, Tribunal la konsege halao julgamentu ba Abertura Debate Instrutoriu refere, razaun tanba Asistente Mari Alkatiri hatoo rekursu hasoru denunsiadus (Deputadu) sira, hodi husu Tribunal konstitui Denunsiadus sira hanesan arguidu.
Rekursu husi Asistente nee hatama iha Tribunal Judisial Primera Instansia Dili iha loron Kinta (14/11/2024), no rekursu nee tama Juiz instrutor do prosesu, hatun kedan despaisu, hodi notifika ba iha parte Ministeriu Publiku no Denunsiadu sira atu resposta rekursu nee, tuir prazu loron 15 nia laran, sura husi loron neebe parte sira simu notifikasaun husi Tribunal.
Nunee, parte sira resposta rekursu husi asistente nian, mak Tribunal Judisial Primera Instansia Dili sei hasae ba iha Tribunal Rekursu, hodi deside kona-ba rekursu nee.
Tuir informasaun katak, Mari Alkatiri aprezenta keixa ida ba iha Ministeriu Publiku, hasoru Deputadu husi Bankada CNRT husi V lejislatura hamutuk nain 21, tanba sente ofendidu ho deklarasaun husi Deputadu CNRT iha momentu neeba, dun Mari Alkatiri simu subornu husi Empreza Conoco Philips.
Ho nunee, Mari Alkatiri aprezenta keixa ida ba iha Ministeriu Publiku ho krimi Denunsia Kalonioza neebe previstu iha artigu 285 husi Kodigu Penal, tanba konsidera deklarasaun nee la iha fundamentu ba faktus.
No Ministeriu Publik (MP) halo tiha analiza no tuir entendimentu MP keixa neebe hatama la iha provas sufisiente ba krimi nee, tanba nee MP la konstitui Deputadu sira nee ba arguidu, ho razaun ida nee MP deside halo tiha arkivamentu ba keixa nee.
Ministeriu Publik (MP) halo tiha arkivamentu, Mari Alkatiri la satisfaz ho arkivamentu nee no hatoo pedidu ida mai iha Tribunal Judisial Primera Instansia Dili, hodi husu Tribunal halo Abertura Debate Instrutorio hodi haree kona-ba arkivamentu husi MP nian ba keixa neebe Mari hatama kona-ba Denunsia Kalonioza, hodi Tribunal pronunsia kona-ba arkivamentu nee legal ka lae.
Nunee, ikus mai Tribunal la konsege halao julgamentu, tanba husi parte Asistente Mari Alkatiri hatama fali rekursu ida, nunee hein parte sira resposta rekursu nee mak haruka ba iha Tribunal Rekursu hodi desidi.
(ter)
