DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial MS, tanba komete krimi hasoru lezadu ho inisial TC.
Iha sala julgamentu laran loron Kinta nee, Juiza Prosesu Jumiati Freitas esplika ba lezadu kona-ba krime refere. Tribunal esplika krimi neebe Ministeriu Publiku akuza ba arguida ho natureza semi publiku, lei fo dalan atu dada fila, kuandu lezadu neebe hanesan vitima ba iha prosesu nee aseita.
Tribunal mos esplika, kuandu lezadu aseita la taka deit, maibe taka ho kondisaun ruma, atu iha futuru arguida labele halo tan aktu nee.
Rona tiha Tribunal, lezadu deklara katak, prosesu nee tuir lo-loos hotu ona no lezadu la keixa tan arguida, maibe arguida la kumpri ba promesa neebe iha, ho ida nee mak lezadu hatoo keixa.
Lezadu deklara, antes nee arguida deklara atu fo osan ba lezadu hodi selu sasan sira neebe arguida halo estragus, maibe too ikus arguida la realiza promesa nee, tanba nee lezadu la aseita dada fila krimi refere no husu Tribunal atu kontinua julgamentu.
Iha sala julgamentu laran Prokurador Renato Bere Nahac hatoo nia pozisaun katak, krimi semi publiku atu deziste keixa depende ba iha vitima, se tentativa la iha solusaun, hakat ba iha julgamentu mak Tribunal deside.
Aleinde nee, Defeza mos hatoo nia pozisaun, aseita ho pedidu Ministeriu Publiku nian, husu Tribunal atu kontinua halao julgamentu ba prosesu refere, tanba vitima ba iha prosesu la deziste.
Ho ida nee, Tribunal Singular deside atu kontinua halao julgamentu ba prosesu refere.
Prosesu tentativa nee prezide husi Juiz Singular Jumiati Freitas, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku nain ida.
(ter)
