BAUKAU, STLTIMORLESTE.com – Relasiona ho publikasaun lista Kombatente rejistu 2019 neebe maioria hetan dedikasaun eskluzivu 3a7 no menus tinan 3, kombatentes sira iha Munisipiu Baukau planu atu halo asaun.
Reprezentante Kombatentes Munisipiu Baukau, Albino da Silva Xavier “Sakoko” hateten, lista kombatente neebe taka sai iha loron 15 Janeiru 2025, la fo benefisiu ba luta nain sira iha Munisipiu Baukau, tanba dedikasaun eskluzivu neebe Ministeriu Asuntu no Kombatente Libertasaun Nasional atribui, la tuir servisu neebe iha antes nee kontribui ba prosesu luta libertasaun nasional.
Nunee parte rezistensia sira iha Baukau, kompostu Vias, Delegasaun, Estafeta, Frente Armada, Frente Klandestina, Juventude Rezistensia inklui responsavel Kaixa sira, halo ona enkontru alargada no sei konjunta ideias iha nivel Postu Administrativu hodi hatoo ba nasional hodi tetu, maibe sei halo mos asaun balu hasoru nasional, tanba lista 2009 neebe publika konsidera diskriminativu.
“Rezistensia nia ema sira iha Baukau sei konsentra hamutuk iha tempu badak hodi halao marsa da paz ida husi jardim dos herois sira iha Baukau hafoin dezloka ba nasional hodi ezije ba Ministeiru kompetente atu responde ba dadus diskriminativu,” hateten “Sakoko” ba jornalista sira hafoin remata enkontru alargada iha Vila Antiga Baukau, Sesta (24/01/2025).
Reprezentante nee konsidera, publikasaun lista 2009 nega povu Baukau nia sakrifisiu ba luta naruk, tanba nee ezijensia liu husi Marsa da Paz husi Baukau ba Dili nee atu fo hanoin ba Ministeriu relevante hodi halao metodu servisu neebe korektu no prinsipiu neebe justu.
Tanba prosesu kontribuisaun ba luta naruk iha pasadu, uza malu hodi atinji mehi, maibe funu remata iha prosesu ukun aan, espiritu rekonhesimentu lakon hodi nega sakrifisiu neebe povu halo.
Enkuantu Prezidente Konselhu Kombatentes Libertasaun Nasional (KKLN) Baukau, Francisco Bere Du’u Gusmão konsidera ezijensia refere hakarak Kombatente no Martire neebe lista taka sai hakarak hotu-hotu hetan dedikasaun eskluzivu 8a14 ba leten, maibe depende durasaun servisu mak determina.
“Sira nia hakarak nee hira karik ami la hatene, maibe sira nee rejeita 3a7 menus a3, neebe kontinua reklama sira nia direitu, ida neebe 8a14, 15a19 no 24 nee la mai ona, maibe sira neebe 3a7 menus a3 nee hotu-hotu hakarak sae ba leten,” Bere Du’u argumenta.
Tuir Beredu’u katak, konselhu nasional fo ona kompetensia ba Munisipal atu simu kontestasaun, neebe tuir lolos halo deit kontestasaun iha Munisipiu hafoin rezultadu aprezenta ba nasional.
Entretantu tuir dadus husi Konselhu Kombatentes Libertasaun Nasional Munisipiu Baukau katak, lista neebe publika Kombatente no Martire sira hamutuk rihun 9 resin kompostu 3a7 no menus tinan 3 halo ona kontestasaun iha Konselhu Kombatentes Munisipal, neebe tuir planu sei aprezanta ba nasional hodi tetu.
(EST 2)
