KELIKAI ANTIGU, STLTIMORLESTE.com – Labarik nain 60 resin iha Suku Namanei, Postu Administrativu Kelikai Antigu, Munisipiu Baukau, labele eskola ka asesu prosesu aprendizajen hanesan nia maluk sira seluk, tanba kondisaun familia laiha rendimentu ekonomia hodi sustenta.
Prezidente APP iha eskola EBF Dom Carlos Filipe Ximenes Belo, José Ximenes Vaz hatete, Suku Namanei rejistu Aldeia 4 mak hanesan Uasufa, Daikou, Sirilaku no Loerea, maibe komunidade husi Aldeia rua hanesan Sirilaku no Loirae Xefe familia barak labele bele lori oan sira ba asesu prosesu aprendizajem iha banku eskola Ensinu Baziku Primeiru Segundu Siklu, tanba kestaun rendimentu ekonomia familia.
“Labarik sira la eskola nee Aldeia rua nee total hamutuk 60 resin, tanba situasaun osan laiha, servisu mos inan aman osan laiha nee mak oan la eskola,” hateten José ba STL, iha Darenafa, Kuarta (03/09/2025).
Kestaun familia sira tuir Jose la lori labarik idade eskola sira ba asesu prosesu aprendizajem, tanba laiha finanseiru atu soa ekipamentus prosesu aprendizajem nian hanesan lapijeira, kadernu no seluk tan.
Tanba razaun inan aman sira laiha rendimentu finanseiru hodi sosa ekipamentus eskola nian ba oan sira atu eskola, tanba moris hanesan vida Agrukultura neebe depedente deit ba produtu lokal, maibe laiha ema ida atu sosa sira nia produtu, nunee laiha rendimentu finanseiru atu fasilita oan sira nia estudu.
“Inan aman sira iha nee halo toos halo natar, maibe laiha rezultadu mak oan la eskola, tanba nee ami husu Gabinete Prezidente ajuda osan ba oan sira atu eskola,” José rekomenda.
Aman husi oan neebe la eskola, António da Costa Vaz rekonhese, nia oan nain 4 dadaun idade sei kiik, maibe la asesu prosesu aprendizajen hanesan nia maluk seluk iha eskola Ensinu Baziku Filial Darenafa, tanba laiha finanseiru. “Hau nia oan nain 4 la eskola, tanba hau nia Aman agrukultores laiha forsa atu ajuda eskola,” Karak António.
Nia argumentu, hanesan Aman sente triste, tanba halakon oan sira nia direitu, maibe atu lao oin sa, basa nee mak realidade tenke infrenta.”Hau nia Aman hakarak sira eskola, eskola la selu maibe hanesan osan atu hola roupa kadernu lapis nee mak laiha, hau mesak labarik barak hau laiha forsa atu haree sira,” António halerik.
Entretantu Asesor Fraternidade Umana, Nuno Horta hatete, husi Prezidensia Republika tenta nafatin atu fo apoiu tuir kapasidade neebe iha, nunee kona-ba asuntu refere sei relata ba PR hodi tetu, tanba labarik sira mak futuru ba Nasaun.
“Kona-ba labarik hirak neebe labele eskola tanba nesesidade ekonomika sei relata ba Prezidente Republika iha enkontru Prezidente ho Primeiru Ministru nian sei hatoo asuntu ida nee atu Ministeriu neebe iha liu kompetensia haree asuntu ida nee,” tenik Nuno Horta
Tuir asesor nee katak, sei relata ba PR liu husi enkontru hodi kontinau ba PM nunee fo hanoin ba Ministeriu Edukasaun haree asuntu refere, tanba nee kompetensia Ministeriu Edukasaun nian.
Jornalista: Tomas Reis
Editora: Carme Ximenes
