LAGA, STLTIMORLESTE.com – Labarik ho idade tinan 6 hamutuk nain 7 iha Samaguia termina ona sira nia estudu pre-eskolar nian iha Suku Tekinomata, Postu Administrativu Laga, Munisipiu Baukau.
Prezidente Pre-Eskolar Sentru Eden Samaguai, Levi Ximenes Vital hateten, Pre-Eskolar Eden Samaguai realiza seremonia graduasaun refere bazeia ba sirkular husi Ministeriu Edukasaun, hodi ofisializa estudante pre-eskolar sira nia prosesu aprendizajem atu kontinua ba estudu iha eskola Ensinu Baziku sira.
“Sira graduasaun laos tanba sira hatene numerasia no litersia, maibe bazeia ba sira nia tinan kundu sira tinan 6 atu pasa ba tinan 7 sira tenke termina sira nia prosesu aprendizajem pre-eskolar,” hateten Levi ba jornalista sira, hafoin remata seremonia graduasaun dala 6 ba estudante sira, iha pre-eskolar Sentru Eden Samaguai, Kinta (13/11/2025).
Nia sublina, bazeia ba sirkular husi Ministeriu Edukasaun neebe iha pre-eskolar Sentru Eden Samaguai fo gradusaun ba estudante sira la bazeia ba hatene literasia no domina numerasia, maibe estudante hirak neebe gradua iha eskola refere kauze hatene natoon ona literasia no domina natoon ona numerasia, tanba estudante hirak nee durante tinan 3 ona tuir aprendizajem iha eskola refere.
“Labarik sira neebe tuir prosesu aprendizajem bele garantia sira iha kualidade, tanba sira durante nee tuir aprendizajem kurikulum neebe husi Ministeriu Edukasaun fo ba kada eskola no eskola Sentru Eden garantia sira iha kualidade literasia no numerasia,” Elvi argumentu.
Prezidente Pre-Eskolar Eden nee husu ba estudante graduante sira nia inan aman atu nafatin akompanha oan sira nia estudu iha prosesu aprendizajem nivel eskola ensinu baziku nian, tanba sira sei idade kiik neebe presiza inan aman nia akompanhamentu.
Responsavel Pre-Eskolar Servisu Munisipal Edukasaun Baukau, Carlos Alberto hateten, seremonia graduasaun refere bazeia ba sirkular husi Ministeriu Edukasaun no orienta pre-eskolar hotu iha territoriu nasional realiza seremonia refere hodi motiva estudante sira kontinua estudu iha prosesu aprendizajem tuir mai.
“Nia importante nee sai motivasaun dahuluk ba kiik oan sira. inan aman sira hotu ba oan sira nia eskola iha futuru tuir mai,” katak Carlos.
Aman estudante graduante, Justino Cabral agradese ba manorin nain sira iha pre-eskolar Sentru Eden Samaguai, tanba lori pasiensia eduka labarik sira too iha faze final prosesu aprendizajen pre-eskolar nian.
“Hau hakarak agradese profesores sira, tanba bele fasilita ami nia oan dentru ami husik ami nia oan iha oras 3 ou 4 nia laran ita boot sira laos manorin deit, maibe sai hanesan inan aman hein sira, tanba pre-eskolar ita hatene deit ona sira hanorin inklui hein labarik nee depende ba sira nia pasiensia, tanba nee hau agradese tebes ba manorin nain sira too ohin loron bele finaliza sira nia estudu iha ensinu pre-eskolar Eden Samaguai,” Justino espresa.
Entretantu seremonia graduasaun nee hetan partisipasaun husi reprezentante Administrador Postu Administrativu Laga, Estrutura Responsavel Pre-Eskolar husi Servisu Munisipal Edukasaun Baukau no estudante graduante ho nia inan aman sira.
Jornalista: Tomas Reis
Editora: Carme Ximenes
