BAUKAU, STLTIMORLESTE.com – Responsavel Pre-Eskolar husi Servisu Munisipal Edukasaun Baukau rekonhese, labarik sira nia partisipasaun iha nivel Pre-Eskolar sei menus.
Responsavel Pre-Eskolar iha Munisipiu Baukau, Carlos Alberto hateten, bareira partisipasaun labarik sira nian iha nivel Pre-Eskolar Ministeriu Edukasaun fo tarjetu ba anivel nasional, maibe ba Munisipiu Baukau seidauk liu bareira neebe Ministeriu Edukasaun kria, tanba labarik sira nia partisipasaun iha nivel prosesu estudu pre-eskolar nian iha Baukau sei menus.
“Tuir dadus peskiza neebe ita foti ita Munisipiu Baukau seidauk liu bareira entaun ita presiza duni halo sosializasaun importansia husi Pre-Eskolar nee, tanba iha eskola Pre-Eskolar balu ita haree nia taxa partisipasaun nee kiik,” Carlos hateten ba jornalista sira iha Samaguai, Suku Tekinomata, Postu Administrativu Laga Munisipiu Baukau, Kinta (13/11/2025).
Nia argumenta, razaun labarik sira nia partisipasaun iha nivel Pre-Eskolar sei menus impaktu ida mak husi inan aman sira, tanba la tau importansia ba prosesu estudu pre-eskolar nian, maibe atu labarik sira domina numerasia no literasia tenke hahu husi nivel Pre-Eskolar, atu nunee fasil liu tan ba labarik sira nia estudu iha prosesu tuir mai.
Nia sublina, partisipasaun labarik sira nian iha nivel Pre-Eskolar Ministeriu Edukasaun preokupa, tanba nee Servisu Munisipal Edukasaun Baukau liu husi Diresaun Responsavel Pre-Eskolar sei hahu ho sosializasaun iha nivel Suku, hodi nunee komunidade sira bele hatene importansia husi Pre-Eskolar lori oan sira ba asesu iha nivel estudu pre-eskolar nian, tanba realidade hatudu iha Aldeia Itidaho no Samaguai, Suku Tekinomata, Postu Laga, Munisipiu Baukau labarik nia partisipasaun iha pre-eskolar menus tebes.
“Ita seidauk bele deside tanba sa mak labarik sira la ba. Hanesan Eden uluk intensivu nee nia implementasaun labarik oituan liu rejistu labarik 38, maibe gradua nee iha nain 7 deit, entaun ita prezisa estuda,” Carlos katak
Nunee mos Prezidente Pre-Eskolar Komunidade Sentru Eden Samaguai rekonhese, inisiu prosesu aprendizajen hahu labarik estudante sira nia partisipasaun krese makaas, maibe prosesu aprendizajen lao too iha klaran numeru partisipasaun hahu reduz neebe eskola la hatene nia motivu.
“Dala barak husi munisipiu fo presaun katak ami nia eskola nia kualidade menus maibe nee mak realidade, ita laos hein deit kualidade maibe kuatidade mak husu ba inan aman sira nafatin akompanha ita nia oan sira hodi hakbesik ba Pre-Eskolar, nunee sira prepara aan no mentalidade atu nunee sira hakat ba Ensinu Baziku sira prontu ona,” Elvi hateten
Prezidente Pre-Eskolar nee rekonhese, labarik barak iha area Samaguia maioria seidauk asesu Pre-Eskolar, tanba kada loron halao deit atividade halimar labarik nian iha mota laran no uma neebe kauza inan aman mak seidauk tau importansia ba oan sira nia futuru.
Tanba nee husu inan aman sira atu lori oan sira ba asesu aprende iha Pre-Eskolar no tau konfiansa ba manorin nain sira atu kuida no eduka oan sira hahu husi Pre-Eskolar, tanba Pre-Eskolar mak dalan dahuluk ba prosesu estudu hotu.
Labarik nia Aman, Justino Cabral rekonhese, tempu agora presiza investe oan sira nia estudu hahu husi Pre-Eskolar, tanba Pre-Eskolar mak dalan ida atu fo konhese numerasia no literasia.
“Ba hau Pre-Eskolar nee importante, tanba hau nia oan kompara ho hau, kuandu hau eskola hau seidauk hatene A.B.C iha Ensinu Primaria, maibe hau nia oan nia idade kiik liu hau uluk sei eskola maibe nia hatene ona lee no sura,” Justino hakotu.
Jornalista: Tomas Reis
Editor: Xisto Mendonça
