BAUKAU, STLTIMORLESTE.com – Sidadaun feto no mane neebe kous husi inan feto neebe hetan violasaun seksual iha tempu okupasaun Indonezia, ohin loron hetan diskriminasaun iha sosiedade.
Diretor AJAR, Jose Luis de Oliveira hatete, durante tempu okupasaun Indonezia iha Timor Leste, laos mane deit mak vitima ba asaun invazor sira nian, maibe feto mos vitima, tanba barak hetan asaun violensia seksual husi invazor sira neebe balun konsege rai oan ba inan feto sira iha tempu neeba.
“Konsekuensia sira nee labarik kous husi aman la klaru, labarik sira nee agora iha sira nia moris hetan diskriminasaun iha komunidade, ema barak la kompreende, katak sira hanoin inan mak hakarak halo hanesan nunee mak sira moris, maibe ida nee konsekuensia funu,” hatete Jose Luis de Oliveira ba jornalista sira, bainhira realiza hela atividade dialogu ho entidade sira iha Vila Nova, Baukau, Sesta (06/12/2024).
Tuir nia, konsekuensia funu naruk neebe Indonezia sira liu husi violasaun seksual hodi rai oan ba inan feto sira laos tanba domin, maibe utiliza feto sira nuudar instrumentu iha prosesu invazaun.
Nunee sidadaun feto no mane neebe kous iha tempu okupasaun daudaun sai ona sidadaun Timoroan, maibe iha prosesu ukun aan hetan diskriminasaun iha sosiedade no trata dokumentus importante hanesan Sertidaun Nasimentu, hetan kritika husi parte Instituisaun sira, tanba laiha sertidaun nasimentu husi aman hodi kompleta sira nia dokumentus iha prossesu tratamentu.
Maibe AJAR iha komitmentu hodi kobre Munisipiu sira iha territoriu nasional hodi realiza dialogu ho entidades sira hodi hasae sensibillidade no inkluzaun ba sobreviventes labarik funu iha tinan 1974 too 1999 ba sosiedade sira hodi labele halo diskriminasaun ba sobreviventes sira.
Tanba inan neebe hetan violasaun seksual iha tempu okupasaun Indonezia no daudaun hetan diskriminasaun iha territoriu nasional hamutuk 460 resin ho total labarik hamutuk nain 90 resin neebe daudaun parte AJAR fo apoiu liu husi akompanhamentu.
Iha fatin hanesan, inan sobrevivente, Maria da Costa Juliana Boavida informa, inan sobrevivente iha Postu Baukau Vila hamutuk nain 12 reijistu husi Suku Bahu nain 7 no Kaibada nain 5 ho labarik sobrevivente hamutuk nain 23 kompostu feto mane.
Enkuantu Sekretariu Jeral Konselhu Munisipal Kombatente Libertasaun Nasional (CMCLN) Baukau, Manuel ‘Alari’ da Costa Soares konta, luta naruk Timor nian feto barak hetan violasaun seksual husi forsa Indonezia, maibe barak la koalia sai, tanba dignidade.
No husu Governu atu fo atensaun ba no halo deskobrementu klean ba sidadaun sira hotu inklui sobrevivente sira, tanba kontribui ona ba prosesu sira, maibe barak mak seidauk hetan rekonhese husi Estadu neebe kontinua fo todan ba prosesu dezenvolvimentu iha Timor.
(EST 2)
