DILI, STLTIMORLESTE.com – Foinsae ou estudante mak futuru nasaun nia, tanba nee presiza kapasita aan liu husi estuda makaas, labele depende deit ba mundu teknolojia, liu-liu Artifisial Intelejensia (AI).
Kestaun nee hatoo husi Diretora IQA dosente no Peskizadora DIT, Teresa Belo ba STL iha salaun DIT kuarta (19/11/2025).
Nia hatete, ohin loron mundu teknolojia, liu-liu AI neebe fasil tebes resposta buat hotu halo estudante sira balun baruk estuda, no sira garantia aan bainhira too ezame ruma ka iha trabalhu bele husu ajuda liu husi AI hodi ajuda sira resposta perguntas neebe iha, ho ida nee dosente nee husu estudante labele depende ba mundu teknolojia, maibe uza mundu teknolojia nee estuda makaas liu tan hodi hasae konhesimentu.
Manorin nain nee hatete, bainhira estudante sira la.kapasita aan no la aproveita mundu teknolojia hodi aprende sei halakon kreatividade estuda, tanba nee nia husu foinsae liu-liu estudante sira nafatin kapasita aan estuda, tuir formasaun oin-oin hodi hasae konhesimentu, nunee futuru bele kontribui ba dezenvolvimentu nasaun.
“Foin lalais ita nia nasaun adere aan ona ba ASEAN, ida nee mos iha vantajen no desvantajen, se ita haree ba nia vantajen ita fasil asesu ba nasaun 11 iha pais sudeste ASEAN nia, no haree ba nia desvantajen se kuandu ita nia joven sira prega aan ba AI, mak dehan diak liu hau lalika estuda, hau halo hau nia trabalhu sira karik depende ba AI, entau sira nia kreatividade nee lakon tiha, entaun meius sira nee la disponivel, sira komesa halo buat sira neebe la diak ba sira nia futuru, tanba nee hau nia mensajen ba estudante sira liu-liu foinsae Timor oan sira motiva aan nafatin liu husi edukasau,” dehan Reitora.
Nia husu foinsae sira nafatin motiva aan liu husi edukasaun, se bainhira estudante iha ona konhesimentu no integridade nebee diak bele kontribui ba nasaun ida nee, la kleur ema husi nasaun seluk mos sei mai Timor, tanba oras nee TL sai membru ASEAN, Timor oan bele ba servisu ema nia rai no ema rai liur mos bele mai servisu iha Timor.
“Serake ita Timor oan sira nee prontu ona atu kompete ho sira ka lae? Entaun liu husi edukasaun hodi hatudu ba mundu katak Timor oan mos bele, laos dehan ema husi nasaun seluk mak bele halo buat hotu, maibe Timor oan mos bele no hau fiar Timor oan mos iha matenek, tanba nee husi edukasaun no kapasita aan bele haree mundu luan liu tan,” dehan nia.
Tanba nee nia nafatin enkoraja joven foinsae sira estuda no kapasita aan liu husi formasaun, no uza mundu teknolojia hodi aprende buat hotu nunee bele hasae tan konhesimentu, se bainhira preparadu ona ho matenek neebe iha bele lori rai nee ba oin.
Foin lalais Primeiru Ministru Kay Rala Xanana Gusmão hatete, jerasaun tuan oras nee idade hotu ona, no ema neebe kontinua lori nasaun ba oin mak jerasaun foun sira, tanba nee Primeiru Ministru mos enkoraja foinsae sira atu estuda makaas nunee kontinua lori rai nee ba oin.
Primeiru Ministru hatete, nasaun nee iha joven neebe matenek no sira neebe oras nee estuda makaas nee nia liman, tanba lori rai nee ba oin ho prospero iha ema neebe preparadu aan ona.
Aleinde nee Prezidente Republika Jose Ramos Horta mos sempre husu estudante no foinsae sira atu estuda makaas, liafuan neebe sempre koalia mak joven no estudante sira tenke estuda, estuda, estuda, tanba nasaun iha joven sira nia liman.
Prezidente hatete, joven no foinsae sira presiza aproveita ho mundu teknolojia nee hodi buka aprende buat foun ruma, nunee bele hasae konhesimentu diak liu tan.
Jornalista: Emerenciana Pinto
Editor: Xisto Mendonça
