DILI, STLTIMORLESTE.com – Seidauk iha baze legal, Ministeriu Edukasaun (ME) labele obriga profesores atu tama ba idade reforma, tanba lei reforma obrigatoriu nee sei iha prosesu nia laran.
Liafuan nee haktuir husi Diretora Rekursu Umanu iha ME, Anita Tavares Ribeiro de Jesus ba STL iha ME Vila Verde, Segunda nee (25/11/2024).
Nia dehan, lei kona-ba reforma obrigatoriu nee PR promulga ona, agora fo hela servisu nee ba iha Komisaun Fungsaun Publiku (KFP) para atu haree. Halo dekretu lei hodi haree ninia prosesu kriteriu, nee duni KFP halo hela ninia koordenasaum entre instituisaun lina ministerial sira para rekolha informasaun sira, hodi aprejenta fali iha Konselhu Ministru (KM).
“Kona-ba dadus profesores reforma ninia nee konforme pedidu deit, tanba ita labele obriga sira. Nee duni konforme dehan balun moras, mate, ita seidauk implementa obrigatoriu, tanba sei prosesa hela lei nee, ME labele obriga ema atu tama reforma, tanba seidauk iha baze legal, no daudaun nee sei prosesa hela, maibe kuandu iha ona mak prosesu ida nee sei lao,” dehan Anita.
Nia hatete, tuir ona enkontru nee hodi koalia kona-ba asuntu ida nee, maibe juridikamente parte juridiku sira sei haree informasaun neebe iha, para bele haree prosesu sira nee, maibe ba asuntu ida nee lina koordenasaun entre ME ho KFP kontinua lao nafatin.
(jac)
