BAUKAU, STLTIMORLESTE.com – Veteranu Fernando Beredu’u Gusmão husu Governu labele sosa tan kareta foun ba deputadu sira, tanba progresu dezenvolvimentu iha Timor Leste lao sei fraku.
“Kona-ba Governu sosa tan kareta 60 resin ba deputadu sira nee, kareta ba deputadu sira mak laiha ga, ita hatene kareta sei iha, maibe Governu sei sosa tan kareta hanoin didiak lai, tanba dezenvolvimentu lao fraku, maibe foti osan iha neebe mak sosa kareta, ita duvida, diak liu nusa la halo estrada sira nee,” hateten Beredu’u ba jornalista STL iha Vila Antiga, Buakau, Tersa (26/08/2025).
Tuir veteranu nee katak, lo-loos Governu jere Orsamentu Jeral Estadu kada tinan foku ba dezenvolvimentu liu liu infraetrutura bazika sira neebe dadaun Povu iha area remotas infrenta, la loos jere orsamentu sosa fali karreta foun ba deputadu sira kada tinan 5.
Tanba karreta neebe dadaun deputadu sira uza sei foun hela no possibilidade bele uza too tinan 10 mai, nunee husu Governu diak liu foku ba nesesidade neebe Povu presiza, maibe Governu hakarak sosa karreta foun ba deputadu sira bele implika ba osan Timor nian.
“Sosa karreta nee ho osan Estadu tó, nee orsamentu privadu iha neebe mak sosa karreta barak hanesan nee. Ita haree orsamentu mos fraku ona mak ita la rai diak halo nesesidade falta sira nee halo fali seluk nee susar,” Beredu’u sublina.
Veteranu nee argumentu, deputadu nain 65 iha Parlamentu Nasional nuudar reprezentante Povu no durante nee halao duni servisu, maibe kona-ba sosa tan karreta foun labele, tanba karreta neebe dadaun deputadu sira utiliza kondisaun sei diak.
Nunee rekomenda ba Governu foti orsamentu neebe preve ba sosa karreta foun nee, aloka fali ba infraestrutura bazika sira neebe Povu prezisa, tanba povu barak dadaun moris iha mukit nia laran.
Iha sorin seluk Xefe Suku Loilubu, Joanico da Costa Freitas hateten, dadaun populasaun iha baze halerik ba infraestrutura bazika sira hanesan kondisaun estrada, eskola bee moos no seluk tan, tanba nee previleizu iha faze ukun aan labele ba deit deputadu sira, maibe responde ba infraestrutura bazika neebe povu prezisa.
“Deputadu sira iha tiha ona karreta, tanba saida mak labele manutensaun, maibe sosa karreta, tanba povu agora nee moris iha situasaun neebe la duun atinji ho diak,” Joanico salienta.
(tom)
