DILI, STLTIMORLESTE.com – Lei garante katak ema hotu iha direitu atu bele partisipa iha kualker atividade, tanba nee labele uza kultura hodi hamenus feto nia espasu ba partisipa iha atividade politiku no seluk tan.
Kestaun nee hatoo husi Feto Potensial, Maria Amaral ba STL iha nia knaar fatin Kaikoli, Díli, Tersa (28/10/2028).
Nia dehan, ema hotu hanesan iha lei nia oin, no iha direitu no dever neebe mak hanesan tantu feto no mane, tanba nee labele uza kultura hodi hanehan feto hodi hamenus feto nia partisipasaun iha politiku.
“Dala barak inan aman uza kultura ida hodi hatete katak partisipa iha politiko nee mane, no feto nia partisipasaun mak uma ida nee hanoin neebe laduk diak, no lalos maibe ohin loron lei garante ona katak feto ho mane iha direitu no obrigasaun neebe hanesan tanba nee labele uza kultura hodi hamenus feto nia partisipasaun iha politiko no atividade seluk tan,” dehan Maria.
Tanba tuir nia ohin loron inan aman barak komprende ona kona-ba Igualdade Jeneru, tanba nee ema fo ona oportunidade ba feto sira asesu iha edukasaun no barak mos partisipa ona iha politiku.
“Los duni ita sistema patriarkal neebe mak fo liu oportunidade ba mane maibe nee tempu uluk, ohin loron lei mos garante ona katak feto ho mane iha direitu no obrigasaun neebe mak hanesan atu partisipa iha vida politiku, bele foti mos desizaun iha familia no seluk tan,” katak nia.
Iha sorin seluk, Prezidente Grupu Feto Parlamentu Timor Leste (GMPTL), Deputada Alianca da Conceicao Aroujo dehan, importante liu mak respeita feto rural nia dignidade no respeita feto hotu iha mundu no iha Timor Leste, labele uza kultura hamenus feto nia espasu.
“Labele uza kultura hodi hamenus feto nia espasu, kultura tenke pozitivu, haboot, hakbiit, haburas, haforsa, fo matak malirin, laos atu hamate feto nia esperansa,” dehan Prezidente GMPTL nee.
Reprezentante Povu iha Uma Fukun Parlamentu Nasional nee hatutan, loron feto neebe selebra katak tinan nee atu reflete hodi halo asaun,nunee hotu hotu hamutuk hodi hadomi no valoriza feto nia direitu.
“Se feto forte Timor Leste forte, no se Feto Rezilente forsa ida neebe bele tuba no tahan hasoru forsa seluk no Timor Leste, sei rezilente, no Feto Timor Leste sustentavel Timor Leste sei sustentavel,” dehan nia.
Iha biban nee Deputada mos hatoo parabens ba aman sira neebe sempre apoiu nia parseira sira, hodi bele hola parte iha foti desizaun nomos atividade hotu.
Tuir observasaun neebe mak STL hetan iha lei inan konstituisaun Republika Demokratika Timor Leste RDTL Artigu 17 Nomos artigu 18, koalia kona-ba Igualdade Jeneru, nomos hatete katak feto ho mane iha direitu no obrigasaun neebe mak hanesan atu bele partisipa iha kualker atividade.
Jornalista: Emerenciana Pinto
Editora: Carme Ximenes
