DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho forma Ofensa ba Integridade Fizika Simples, solisita ba iha Tribunal Singular atu aplika pena multa ba arguidu ho inisial JSX, tanba halo agresaun hasoru feen ho inisial J.
Iha alegasaun loron Segunda (05/05/2025) iha sala julgamentu laran, Prokurador Hernani Rangel deklara katak, arguidu konfesa ba faktus. Maibe atu halo redusaun ba krimi nee iha futuru, MP solisita ba iha Tribunal Singular atu aplika Pena Multa ba arguidu.
Enkuantu husi parte defeza, Marsal Mascarinhas solisita ba iha Tribunal atu aplika pena Admoestasaun ba arguidu, tanba sira diak malu ona.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe Juiz Prosesu Arjentino Nunes lee sai katak, arguldu JSX ho lezada J hela no moris hamutuk iha uma ida ndar fen ho laen hahu Iha tinan 2021.
Durante forma sira nia uma kain, lezada ho arguidu kous oan feto ida, ekonomikamente lezada depende ba arguldu.
Loron 21 fulan Julhu tinan 2023, oras tuku 18:00 OTL, lezada ho nia oan fila husi Mascarenhas ba sira nia uma iha Aldeia Moris Foun, Santa Cruz, wainhira too iha uma lezada fo sira nia oan ba arguidu kous.
Momentu neeba arguidu bolu lezada atu fo bee ba labarik hemu, maibe lezada haree katak labarik atu dukur ona mak lezada kous labarik hodi lori ba kuartu laran hodi fo susu, arguidu la simu ho atitude lezada nian mak komesa mosu diskusaun entre arguidu ho lezada.
Momentu iha diskusaun nee mak halo arguidu hirus hodi komesa halo agresaun fizika hasoru lezada, arguidu lori liman hodi tuku dala rua ba lezada nia hasan karuk ho los, arguidu rasta lezada mak kontinua tuku tan dala tolu tutuir malu ba lezada nia liman parte kabas karuk hodi rezulta bubu no metan, maibe lezada la ba halo keixa iha Polisia.
Iha fali loron 25 fulan Julhu tinan 2023, wainhira lezada ba vizita nia inan aman sira iha Mascarenhas mak familia sira haree katak, lezada nia matan fukun metan, hafoin husu ba lezada mak lezada mos deskobre katak, arguidu mak halo agresaun hasoru lezada, iha tempu nee kedas familia sira lori lezada ba halo kedas keixa iha polisia eskuadra Nain Feto hodi transporta lezada ba iha polisia VPU.
Konsekuensia husi agresaun arguidu nian, rezulta bubu no metan iha lezada nia matan karuk, bubu no metan mos iha lezada nia liman karuk, lezada mos ba halo tratamentu iha iha sentru saude Vera Cruz.
Arguidu halo ho forma livre, ho depropozitu halo agresaun fizika hasoru lezada J nuudar arguidu nia kaben, katak lori liman hodi halo agresaun hasoru lezada konsidera hanesan meiu ida hodi halo moras ba lezada nia isin, tuir buat neebe mak hakerek ona lha leten.
Hahalok arguidu nian ho konsiensia rasik no hatene katak hahalok nee lei bandu maibe arguidu halo nafatin.
Ho hahalok sira nee, konsidera arguidu JSX hanesan autor material ho forma konsumadu, Pratika krime ida, Violensia Domestika, tuir Lei n° 7/2010, ho forma ofensas integridade fizika simples, tuir artigu 145, husi Kodigu Penal.
Audensia julgamentu nee prezide husi Juiz Singular Arjentino Nunes, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Marsal Mascarinhas.
(ter)
