DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho Forma Ofensa ba Integridade Fizika Simples, solisita ba iha Tribunal Singular atu aplika pena suspensaun ba arguidu ho inisial TP, tanba halo krimi hasoru lezada ho inisial AB hanesan nia feen.
Iha alegasaun nee, Prokurador Domingos Barreto deklara katak, arguidu konfesa imparsial ba faktus, maibe atu halo redusaun iha futuru, solisita ba iha Tribunal Singular atu aplika pena suspensaun ba iha arguidu.
Enkuantu husi parte defeza, Marsal Mascarinhas haree katak, arguidu konfesa imparsial ba faktus, arguidu ho lezada mos agora diak malu ona, tanba nee solisita ba iha Tribunal Singular atu aplika pena Admoestasaun ba arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak, arguidu TP ho lezada AB moris hamutuk hanesan feen ho laen dezde tinan 2019, no iha oan nain 3, hela hamutuk iha uma ida no ekonomikamente lezada dependencia ba arguidu.
Iha loron 26 fulan Maiu tinan 2024, haleu oras tuku 08h00 OTL, lezada haruka arguidu ba sosa aimoruk tan sira nia oan feto Ivana moras isin manas.
Arguidu la lori osan nee ba sosa aimoruk maibe hodi ba hemu tua, nune fila mai lezada hirus arguidu ho hakilar, arguidu sai nervozu hodi baku no basa dala 4 iha lezada nia hasan parte dala rua no matan laran parte los dala rua, hetan bubu no metan.
Konsekuensia husi arguidu nia hahalok nee rezulta lezada hetan moras, kanek no raan sai barak nunee lezadu ba halo tratamentu mediku.
Nunee Konstitui arguidu TP hanesan autoria material ho forma konsumada ba krimi Ofensas Korporais Simples Konjuga ho Lei Violensia tuir artigu 145 husi Kodigu Penal.
Hatan ba akuzasaun neebe iha, arguidu konfesa imprasial ba faktus katak, arguidu halo duni faktus refere, arguidu mos konfesa kona-ba motivu neebe iha, arguidu mos arepende ho nia hahalok, arguidu promete ba Tribunal katak iha futuru arguidu sei la halo tan agresaun fizika hasoru lezada ho nia oan sira.
Iha sala julgamentu laran lezada mos haforsa tan akuzasau neebe iha, katak arguidu halo duni agresaun fizika hasoru lezada, lezada mos esplika ba Tribunal katak, liu tiha loron hira familia parte rua tur hamutuk hodi rezolve problema no arguidu mos husu deskulpa ba lezada iha familia nia oin, arguidu mos promete katak nia sei la halo tan agresaun fizika hasoru lezada iha futuru, arguidu mos fo sala lezadu ho osan US$ 60.
Audensia julgamentu nee prezide husi Juiz Singular Argentinho Nunes, Ministeriu Publiku reprezenta husi Prokurador Domingos Barros, arguidu hetan asistensia legal husi Defensor Publika Marçal Mascarenhas.
(ter)
