DILI, STLTIMORLESTE.com – Arguidu (laen) ho inisial AdS lori ai farina kain hurlele ka baku (lezada) feen inisial RS, tanba feen simu hasoru laen neebe gava feto seluk bonita liu lezada atu halao relasaun domin.
Tribunal Judisial Primeira Instansia Dili (TJPID) halao julgamentu ba arguidu ho inisial AdS, tanba komete krimi hasoru lezada RS.
Tuir akuzasaun neebe iha katak, arguidu AdS ho ofendida RS hanesan feen no laen, hela hamutuk iha uma ida iha Ermera Hatulia.
Iha loron 13 fulan Novembru tinan 2024 oras tuku 11:00, arguidu gava feto seluk bonita atu halao relasaun domin.
“Tanba nee lezada hateten ba arguidu katak, se o haree nia bonita tanba sa o la kaben ho nia, o tenke kaben fali ho hau,” hatete akuzasaun nee.
Rona ida nee, arguidu silu ai farina kain hodi baku ba iha lezada nia isin, liman inklui ulun.
Konsekuensia husi arguidu nia hahalok nee, halo lezada sente moras hodi ba hatoo keixa.
Tanba nee, Ministeriu Publiku akuza arguidu komete krimi Violensia Domestika ho Formasa Ofensa Integridade Fizika Simples, neebe previstu iha artigu 145 husi Kodigu Penal.
Hatan ba akuzasaun neebe iha, arguidu konfesa imparsial ba faktus no arguidu deklara sei la halo tan aktu nee iha futuru.
Lezada mos reforsa tan katak, depois akontesimentu too mai agora sira la iha tan problema ona.
Tanba nee Tribunal husu ba iha Ministeriu Publiku atu tama ba iha alegasaun. Iha alegasaun MP husu Tribunal atu aplika pena multa ba arguidu.
Enkuantu husi parte defeza nian aseita ho pedidu MP nian.
Rona tiha MP no defeza, Juiz prosesu deklara katak, prosesu ida nee arguidu konfesa ba faktus, reforsa tan ho deklarasaun lezada nian.
Tanba nee Tribunal haree katak, kastigu neebe aplika ba iha arguidu mak pena multa, nunee iha futuru arguidu labele pratika tan aktu refere.
Ho nunee, Tribunal deside aplika pena multa US$ 50 ba arguidu. Tribunal mos esplika, arguidu la kumpri pena multa neebe iha, sei tama iha prizaun durante loron 80.
Tribunal mos fo hanoin ba arguidu, atu iha futuru labele pratika tan aktu refere, se arguidu kontinua pratika mak Tribunal sei aplika kastigu neebe sei todan.
Audensia julgamentu nee prezide husi Juiz Singular Ana Paula, MP reprezenta husi Prokurador, Claudino do Rozario, arguidu hetan asistensia legal husi Defensor Publiku, Jose da Silva.
Jornalista: Terezinha De Deus
Editora: Carme Ximenes
