DILI, STLTIMORLESTE.com – Kazu neebe akontese laen oho feen ho kondisaun gravida, konsidera hanesan krimi Doloso, tanba ajente pratika faktu ho intensaun.
“Kazu neebe laen oho nia feen gravida bele konsidera hanesan krimi doloso, tanba ajente pratika faktu nee ho intensaun,” dehan Jurista Sergio Dias Quintas ba STL iha Tribunal Dili, Sesta (25/10/2024).
Nia hatutan, faktu nee konstitui krime previstu iha artigu 139 alinea G husi Kodigu Penal, neebe hateten katak, sente neebe oho ema seluk iha sirkunstansia neebe hatudu sensurabilidade ka perversidade espesial, nomeadamente, Kuandu vitima sente nia konjuje, dexendente, axendente, kolateral ka afim too grau da-rua, adotadu, ka ema neebe moris ho nia hanesan iha neebe iha dependensia ierarkika, ekonomika ka laboral, sei hetan pena prizaun tinan 12 too tinan 25.
Sergio esplika, laos lei mak la forte, maibe dala ruma akontese aktu sira hanesan nee mai husi fator balu mak provoka ema nee hodi pratika krime omisidiu nee, fator ida mak iha Timor koezaun familia nee seidauk forte.
Nia hatutan, laos ema nia konhesimentu ba lei mak menus, maibe buat oho ema nee la permite husi kualker reli5ziaun no lisan, entaun ema hotu-hotu konsiente katak, oho ema nee buat ida la diak, nee ema hotu hotu hatene.
Nunee, hakarak ka lakohi se mak pratika krime omisidiu, tenki punidu ho situasaun ida bele agrava nia pena.
Iha fatin ketak, Akademiku UNTL, Rafael de Jesus katak, kondena aktu neebe halo husi autor, husu Justisa ba autor.
“Hanesan Timoroan sente triste ho aktu ida nee, hatudu katak laos oho ema ida maibe oho ema rua, tanba nee kondena aktu nee no husu justisa,” dehan nia.
(ter)
