DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JRX, neebe komete krimi Omisidiu Agravadu no Arma Branka hasoru lezada ho inisia BJ nuudar arguidu nia feen.
Ba prosesu ida nee prezide husi Juiz Koletivu, Arjentino Nunes, Ivan Patrocenio, Zulmira Auxiladora, Ministeriu Publiku reprezenta husi Prokuradora Benvinda Do Rosario, arguidu hetan asistensia legal husi Defensora Publika Laura Valente.
Antes julgamentu atu hahu, Juiz Prosesu Arjentino Nunes lee sai akuzasaun neebe mai husi Ministeriu Publiku katak, arguidu JRX ho lezada BJ nuudar feen ho laen no sira iha oan nain 2 ho idade menoridade.
Iha loron 20 fulan Outubru 2024, oras tuku 01:00 madrugada, iha Dili, ho razaun neebe la klaru arguidu hodi tudik sona lezada hamutuk dala 13, iha lezada nian kakorok dala 4, sona mos iha lezada nia liman parte los dala 1, no arguidu hodi tudik koa lezada nia liman parte los besik kotu, sona tan iha lezada nian kanotak dala 1, sona iha lezada nian hirus matan dala 1, sona iha lezada nian kalilin dala 1, sona iha lezada nian brasu parte los dala 1, sona iha lezada nian knosen parte los dala 1, sona iha lezada nian kotuk laran dala 2, neebe rezulta lezada kanek todan.
Depois arguidu sona tiha lezada, arguidu mos hodi tudik neebe nia kaer sona fali ba nian hirus matan dala 1, kalilin no kakorok hodi rezulta kanek.
Hafoin testemunha AJ rona lezada hakilar, nunee testemunha halai ba haree kondisaun lezada ho arguidu neebe kanek todan hotu, nunee testemunha halai ba estrada hakilar hodi husu ajuda, no vizinhu sira rona hodi ba too iha fatin, no testemunha kontinua halai ba Eskuadra Polisia hodi hatoo informasaun.
Kuandu Polisia too iha lokal, lezada iis kotu no mate, nunee Polisia halo kedas detensaun ba arguidu no apreensaun ba objetu utilizado.
Iha altura neeba lezada ho kondisaun gravida ho fulan 7 liu, neebe prediksaun katak, lezada sei partus iha fulan Dezembru, maibe iha kalan akontesimentu lezada sente kanotak moras ona, nunee halo arguidu deskonfia no hirus hodi sona lezada dala barak halo lezada mate.
Arguidu JRX komete krimi nee ho voluntaria, livre no konsientemente, arguidu ho intensaun hasai lezada nian vida, utiliza tudik hodi sona dala barak ba lezada nian isin lolon neebe ikus mai rezulta lezada mate, no arguidu hatene katak nia hahalok nee kontra lei, maibe arguidu halo nafatin.
Konstitui arguidu JRX kanesan autoria ba material ba konkursu krimi 2, Omisidiu Agravadu konjuga ho Violensia Doméstika no mos utilizasaun Arma Branka neebe previstu no punidu tuir artigu 139 pontu G no H husi Kodigu Penal, konjuga ho artigu 3 pontu A ho 35 pontu B hotu-hotu husi Lei n. 7/2010 Lei Kontra Violensia Domestika, konjuga ho artigu 2 no pontu G no mos artigu 20 numeru 1 hotu-hotu husi Lei n. 5/2017, loron 19 fulan Abril kona-ba Rejime Juridiku Relativu Pratika Arte Marsiais Rituais Arma Branka rama ambon iha alterasaun Kodigu Penal.
Hatan ba akuzasaun nee, iha sala julgamentu laran Juiz prosesu konfirma ba iha arguidu maibe arguidu la koalia ho ibun. Tanba nee Tribunal uza deit maneira neebe arguidu bele halo mak Tribunal konfirma arguidu hatun ho doko ulun.
Tribunal konfirma konaba motivu akontese problema keta iha mosu diskonfia, arguidu mos hatan. No Tribunal konfirma konaba sona lezada dala barak arguidu mos rekonhese no hatan.
Arguidu mos hatudu ba Tribunal kona-ba kanek neebe arguidu sona aan rasik, hanesan arguidu lori tudik sona aan iha kalilin hirus matan no kakorok.
Tribunal bolu arguidu hamriik iha oin hodi konfirma kona-ba fotografia husi arguidu nia feen nian, arguidu mos hamriik ba iha oin hodi haree no hamonu mataben.
Arguidu rekonhese oras nee daudaun arguidu iha oan nain rua mak iha hela liur no hela ho familia sira.
Tribunal rona tiha arguidu nia deklarasaun, Tribunal deside adia prosesu nee ba loron seluk hodi rona deklarasaun husi sasin no familia husi arguidu nian.
Iha sala julgamentu Juiz konfirma ba iha Guarda Prizional kona-ba arguidu nia kondisaun, guarda sira informa katak, arguidu nia kondisaun sempre tur nonok hakruk deit la konversa ho ema no dala ruma atu han tenke obriga mak foin bele han.
(ter)
