DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba laen (Arguidu-red) ho inisial TCC, neebe “tinju” ka tuku ninia feen (Lezada-red) inisial EC nia hasan too moras, tanba arguidu lori lezada nia telefone ba pinoor tiha.
Tuir akuzasaun neebe iha katak, lezada EC ho arguidu TCC hanesan feen ho laen.
Iha loron 23 fulan Marsu tinan 2025, arguidu uza liman hodi tuku kona iha lezada nia hasan, kontinua uza liman buti iha lezada nia kakorok, no tuku dala rua iha lezada nia kabas kauza moras.
Motivu husi problema nee, tanba lezada husu nia telefone ba arguidu, tanba arguidu ba pinoor tiha lezada nia telefone.
Konsekuensia husi arguidu nia hahalok, halo lezada sente moras hodi ba hatoo keixa.
Tanba nee, Ministeriu Publiku (MP) akuza arguidu komete krime violensia domestika ho forma ofensa integridade fízika simples, neebe previstu iha artigu 145 husi Kodigu Penal.
Hatan ba akuzasaun neebe iha, arguidu deklara katak, saida mak konsta iha akuzasaun loos hotu, motivu tanba arguidu riba lezada nia telefone.
Arguidu deklara, sira diak malu ona, arepende ba nia hahalok nee, promete sei la halo tan aktu nee iha futuru.
Rona tiha arguidu nia deklarasaun, Ministeriu Publiku haree katak arguidu konfesa ba aktu neebe iha, tanba nee husu Tribunal atu aplika pena multa tuir kapasidade arguidu nian.
Maibe Defeza haree katak arguidu konfesa, tanba nee husu atu aplika pena kmaan.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Zulmira Auxiladora, Ministeriu Publiku reprezenta husi Prokurador, Hernani Rangel, arguidu hetan asistensia legal husi Defensor Publiku, Fransisco Martins.
Jornalista: Terezinha De Deus
Editora: Carme Ximenes
