DILI, STLTIMORLESTE.com – Arguidu ka laen ho inisial NMdSSM lori liman tuku ninia feen ka lezada MGPdADS nia hirus matan, tanba deskonfia nia feen “selingkuh” (Amante-red) ho mane seluk.
Tribunal Judisial Primeira Instansia Dili halao julgamentu ba arguidu ho inisial NMdSSM, tanba komete krimi hasoru lezada ho inisial MGPdADS.
Tuir akuzasaun neebe Juiz prosesu lee sai katak, iha loron 16 fulan Junhu tinan 2023, haleu oras tuku 16:00, OTL, iha Audian Dili.
Arguidu NMdSSM lori liman loos hodi tuku dala ida kona iha lezada MGPdADS nia hirus matan sorin karuk, arguidu dada lezada tama ba iha ema nia portaun hodi tuku dala ida kona iha lezada nia liman brasu.
Nune, lezada ho tanis lao tama fali ba loza laran, maibe arguidu tuir lezada tama ba loza laran hodi tebe dala ida kona iha lezada nia hasan sorin karuk, lezada halai tiha ba dapur loza nian, maibe arguidu tuir nafatin lezada hodi lori liman tuku dala ida kona iha lezada nia ulun sorin karuk, no tuku kona iha lezada nia rentos dala ida ho makaas.
Konsekuensia direta husi arguidu nia hahalok, lezada hetan moras iha hirus matan, metan no bubu iha liman brasu, moras iha hasan sorin karuk, bubu iha ulun no rentos.
Lezada ba halao tratamentu iha Sentru Saude Vera Cruz. Kauza husi problema nee, tanba arguidu deskonfia lezada amante ho mane seluk.
Arguidu NMdSSM halo ho forma livre, deliberada no konsientemente hatene katak, lori liman loos hodi tuku kona iha lezada MGPdADS nia hirus matan sorin karuk, arguidu dada lezada tama ba iha ema nia portaun hodi tuku kona iha lezada nia liman brasu, nunee arguidu tuir lezada tama ba loja laran hodi tebe kona iha lezada nia hasan sorin karuk, arguidu lori liman tuku kona iha lezada nia ulun sorin karuk, no tuku kona iha lezada nia ren tos ho makas, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee proibidu no punidu tuir lei penal.
Tanba nee, Konstitui arguidu NMdSSM, nuudar autor material ho forma konsumadu ba pratika krime ofensa ba integridade fizika simples ho forma violensia domestika 1 (ida), previstu no punidu tuir artigu 145º hosi Kodigu Penal hosi lei kontra violensia domestika lei numeru 07/2010, loron 07 fulan Julhu.
Hatan ba akuzasaun neebe iha arguidu deklara katak, arguidu nia fen servisu iha loza, iha loraik ida arguidu liu kona husi loza neebe lezada servisu ba, arguidu haree lezada hamrik hela ho lezada nia eis namoradu.
Tanba nee arguidu mos too iha uma arguidu tenta telefone lezada, maibe lezada la foti telefone no taka mate tiha telefone. Ho nunee maka halo arguidu nervozu, hodi tuir lezada ba iha loza no halo agresaun ba lezada.
Arguidu mos rekonhese, motivu husi problema nee tanba deskonfia lezada amante ho mane seluk.
Arguidu deklara, depois de akontese tiha problema fila mai uma, lezada no arguidu diak malu fali, hahu husi neeba mai to agora la iha tan problema ona.
Tribunal haree arguidu konfesa imparsial ba faktus, tanba nee Tribunal presinde atu la rona deklarasaun husi lezada, no husu ba iha Ministeriu Publiku atu tama ba iha alegasaun.
Iha alegasaun Prokurador husu Tribunal atu aplika pena multa ba arguidu, enkuantu defeza husi arguidu nian husu Tribunal atu aplika pena neebe justu.
Rona tiha alegasaun nee, Juiz prosesu hare katak arguidu konfesa imparsial ba faktus, no promete sei la halo tan hahalok nee iha futuru.
Ho nunee Tribunal tetu sirkunstansia sira hotu, no ikus mai deside pena multa ba arguidu 65 dolar. No Tribunal husu atu arguidu la selu pena multa refere, arguidu sei tama iha prizaun durante loron 40.
Tribunal mos fo hanoin atu arguidu labele halo tan aktu hanesan nee iha futuru, se halo hanesan nee nafatin arguidu sei hetan kastigu todan.
Audensia julgamentu nee, prezide husi Juiz Singular Ana Paula, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Fransisco Martins.
Jornalista: Terezinha De Deus
Editora: Carme Ximenes
