BAUKAU, STLTIMORLESTE.com – Lafaek hamutuk 5 serku sidadaun Sertório Moreira, idade 48 too mate iha mota Liuborouai, Suku Seiçal, Postu Administrativu Baukau Vila, Munisipiu Baukau.
Feen kaben Cesaltina Cristina Correia konta, vitima Sertório Moreira sai husi uma iha loron 06 Janeiru 2026, tuku 19:00 kalan, objetivu atu ba kail tuna iha mota no hetan tata husi Lafaek.
“Tata iha nia ain no kelen, nia isin lolon la tatan, ema neebe salva hakilar mak nia oan mane halai ba rasta sae maibe mate tiha ona,” hateten feen kaben Cesaltina Cristina Correia ba jornalista sira iha Samalari Baukau Vila, Kuarta (07/01/2026)
Feen kaben nee konta, insidente neebe Sertório Moreira enfenta hetan husi sidadaun sira neebe besik iha fatin akontesimentu, hafoin hakilar hodi nia oan mane halai too ba fatin akontesimentu hodi kous sae vitima nia isin, maibe vitima laiha ona iis, tanba Lafaek tata iha nia ain no kelen rezulta ain ida kotu provoka raan sai barak hodi implika ba vitima nia vida.
Xefe Aldeia Solurai, Suku Samalari, Postu Baukau Vila, Anselmo Cesário Fraga konta, insidente nee akontese bainhira vitima Sertório Morreira sai husi uma Suku Samalari ba kail tuna, ikan no boek iha mota Liuborouai, Suku Seiçal, Postu Baukau Vila no rezulta mate fatin, tanba hetan tata husi Lafaek iha mota refere.
“Hau nia komunidade ba kail ikan iha area Liuborouai kanu hasan Seiçal nian mak Lafaek hamutuk 5 tata nia, 2 kiik 3 nee mak boot, nia ain sorin Lafaek han hotu,” Anselmo katak.
Tuir Xefe Aldeia nee katak, mota ligasaun Samalari ho Seiçal daudaun nakonu ona ho Lafaek, tanba nee husu ba Governu atu haree no kaptura Lafaek sira iha mota laran hodi ba husik iha nia fatin, nunee labele fo risku ba sidadaun sira nia movimentu iha mota laran.
Vitima Sertório Morreira nia mate isin asegura ona iha nia rezidensia Suku Samalari, Postu Baukau Vila no parte Komando Polisia Munisipiu Baukau liu husi Servisu Investigasaun rekolha ona dadus kona-ba insidente refere.
Entretantu Sertório Morreira mate husik hela feen kaben, oan nain 6 no bei oan.
Jornalista: Tomas Reis
