BAUKAU, STLTIMORLESTE.com – Lafaek lori lakon sidadaun Caetano de Almeida ho idade 58 iha Suku Larisula, Postu Administrativu Baguia, Munisipiu Baukau.
Komandante Interinu, Komando Polisia Munisipiu Baukau, Superintendente Joao Sancho Pires haktuir, insidente nee akontese iha loron 03 Maiu 2025, pur volta tuku 10:00 dadersan, iha neebe vitima Caetano Almeida ba natar no hetan tata husi Lafaek iha natar laran area Suku Larisula.
“Nia atu ba nia natar mak Lafaek tata lori lakon hela. Vitima naran Caetano de Almeida 58 anos, tata nia lori lakon tiha iha bee laran,” informa João Sancho Pires ba Jornalista sira iha Vila Nova, Baukau, Segunda (05/05/2025).
Nia konta, tuir informasaun neebe parte Komando Polisia Munisipiu Baukau simu, Lafaek tata hodi lori lakon vitima Caetano Almeida hetan husi komunidade Suku Larisula neebe halo natar hamutuk, maibe la konsege salva, tanba hafoin tata hodi lori vitima nia isin mout iha bee laran.
Nia sublina, inisiu loron vitima Caetano de Almeida hetan tata husi Lafaek hodi lori lakon vitima nia isin mout iha bee laran, parte komunidade sira tenta buka no la konsege hetan, maibe iha loron 04 Maiu komunidade konsege tuda diman ba Lafaek ida iha mota Larisula, maibe kontinua la konsege kaer, tanba mout lakon iha bee laran.
“Horiseik dehan sira tuda diman ida ba bee laran, maibe Lafaek nee sei lakon hela, neebe Autoridade Larisula hamutuk ho lia nain sira kontinua ho tradisaun atu bele buka tuir Lafaek ida neebe loos mak tata nunee bele atende ida nee,” João Sancho Pires fundamenta.
Komandante nee deklara, mezmu esforsu komunidade Suku Larisula hamutuk ho familia vitima tenta buka tuir Lafaek sira iha mota Larisula atu oho hodi buka vitima Caetano de Almeida nian isin iha Lafaek nia kabun laran, maibe lia nain hamutuk ho Autoridade lokal inisia ona sei buka tuir ho sistema tradisaun kultural, nunee bele identifika Lafaek ida neebe loos mak tata hodi lori lakon vitima nia isin.
Mezmu nunee, maibe daudaun komando Polisia Munisipiu Baukau liu husi Polisia Eskuadra Postu Baguia hamutuk ho autoridade lokal no postu inklui ho ekipa Autoridade Protesaun Sivil Munisipiu Baukau no komunidade Suku Larisula kontinua buka tuir vitima nia isin iha mota Larisula.
(tom)
