BAUKAU, STLTIMORLESTE.com – Futebolista Laga Oan sira husu Governu reabilita kampu futebol Gariuai iha Suku Soba, Postu Administrativu Laga, Munisipiu Baukau.
Rekomendasaun nee hatoo husi Futebolista Helio Gama de Brito Gusmão ba jornalista sira iha Kampu Futebol Gariuai, Postu Laga, Tersa (22/10/2024).
“Ami husu para atu hadia ami nia kampu nee, tanba ita nia kondisaun kampu hanesan nee (jogu hahu rai rahun suar),” nia rekomenda.
Tuir nia, presiza parte relevante atensaun ba kampu futebol sira iha teritoriu nasional inklui kampu futebol Gariuai, atu nunee bele garante kualidade desportiva husi area futebol.
Iha fatin hanesan, Prezidente Komisaun Organizadora ba eventu desportu komunitariu iha Postu Laga, atual Komandante Polisia Eskuadra Postu Laga, Duarte B. Ximenes Soru fundamenta, kondisaun kampu refere, antes nee la adekuadu atu utiliza ba eventu jogu komunitariu liu-liu desportu, tanba nakonu ho fatuk no ai, maibe parte Autoridade Postu esforsu tenta diriji karta ba kompanhia internasional Norinco hodi nia ekipamentus pedazu halo normalizasaun.
“Hau hatoo ona ba pontu fokal MJDAK Munisipiu nian, oinsa mak ita nia jovem sira ba futuru diak liu tan presiza mos fatin, tanba ita koalia kona-ba regras kampu nian ida nee difisil, tanba kampu nee la merese atu uza, maibe ami uza depois mak Nain Ulun sira haree,” tenik Soru.
Hatan ba kestaun nee, Koordenador Pontu Vokal MJDAK Munisipiu Baukau, Elisio Plasidio Ramos rekonhese, kampu futebol sira neebe eziste iha Munisipiu Baukau, inklui kampu futebol Gariuai kondisaun seidauk minimu atu utiliza, tanba kondisaun aat, maibe obrigatoriu tenke utiliza, tanba seidauk iha kondisaun.
“Hau koalia ona, sira avansa lai ho kampu nee (kampu futebol Gariuai) depois sira nia relatoriu ba mak ita rekomenda iha enkontru nasional para haree kampu Postu Laga nian,” nia argumenta.
Nia hateten, provizoriu pontu fokal MJDAK Munisipiu nian simu ona relatoriu husi Suku Sagadate nian neebe relata ona ba nasional atu halo manutensaun, maibe sei iha prosesu laran.
(EST 2)
