BAUKAU, STLTIMORLESTE.com – Negosiante balu iha merkadu foun Tuanau Munisipiu Baukau tenke taka fatin negosiu nian, tanba durante nee laiha kompradores sosa sira nia sasan.
Negosiante Catarina Baptista hateten, Politika Autoridade Munisipiu Baukau muda negosiante sira husi merkadu tuan hanesan beskem no Vila Nova ba merkadu foun Tuanau halo ona tinan ida, maibe negosiante sira la hetan rendimentu diak, tanba nee negosiante balu taka fatin negosiu ho razaun estrada husi rotunda Vila Nova ba merkadu foun Tuanau kondisaun aat, neebe kauza kompradores sira labele too merkadu foun refere sosa negosiante sira nia sasan.
Aleinde nee kondisaun estrada merkadu Tuanau mos laiha fatin para karreta motor, nunee kompradores sira laiha vontade ba sosa iha merkadu refere.
“Ami sente triste dala ruma la sosa ami tanis karreta motor loron seluk la mai, Governu kapasidade iha karik halo terminal nee mak karreta motor mai para iha nee sosa ami nia sasan, estrada merkadu nian nee tenke halo, tanba estrada aat nee mak halo ema la mai sosa loja barak taka,” heteten Catarina iha merkadu Tuanau, Tersa (07/10/2025).
Nia komenta, tinan ida ona faan iha merkadu foun Tuanau, maibe rendimentu neebe hetan loron rua nian mak too US$ 3.00, tanba laiha kompradores. Nunee negosiante balu taka fatin negosiu hodi tula sira nia sasan ba faan fali iha fatin seluk.
“Loja sira taka nee dala ruma Kinta Domingo loke, mais dala ruma la loke entaun aluga ema nia karreta ba faan fali iha fatin seluk, entaun ami husu estrada nee deit, dehan Buakau nee kota kedua maibe terminal laiha nee ami moe,” Catarina Baptista argumenta
Negosiante nee husu Governu atu estabelese fatin para karreta motor iha merkadu foun refere no hadia estrada husi rotunda Vila Nova too merkadu laran nunee bele fasilita movimentasaun transporte hodi kompradores sira too merkadu refere sosa sasan, tanba durante kompradores sira menus ba merkadu foun sosa sasan kauza impaktu estrada no laiha fatin para karreta no motor iha merkadu laran.
Iha sorin seluk Negosiante Cejarina da Costa Pereira salienta, prosesu muda negosiante sira husi merkadu tuan ba merkadu foun Tuanau hanesan negosiante koopera tebes ho Autoridade Munisipiu Baukau, tanba ho razaun atu dezenvolve sidade urnaba Baukau, maibe kuaze tinan ida ona seidauk iha progresu dezenvolvimentu lao iha sidade urnana Baukau no pior liu tan, hamosu merkadu tolu iha Baukau Vila fo impaktu ba negosiante sira iha merkadu Tuanau, tanba la hetan rendimentu.
“Ami la konkorda merkadu halo ba tolu, ida faan iha PLN, ida iha bundaran ida iha kota lama oinsa ema bele mai sosa ami nia sasan,” katak Cejarina.
Negosiante nee la konkorda ho politika Autoridade Munisipiu Baukau, tanba tuir politika neebe iha katak negosiante hotu hotu muda ba merkadu foun Tuanau, maibe daudaun husi negosiante balun negosiu iha merkadu Vila Antiga, area edifisiu EDTL Baukau no rotunda Vila Nova neebe fo impaktu ba negosiante sira iha merkadu Tuanau, tanba kompradores sira la ba merkadu foun hodi sosa negosiante sira nia sasan no produtu lokal neebe faan iha merkadu Tuanau.
Entretantu Negosiante Felismina Cabral sente triste, tanba negosiu neebe nia halo kreditu osan husi Moris Rasik hafoin halo negosiu hanesan faan modo, maibe menus kompradores hodi sosa produtu neebe nia faan.
“Ami kredit iha moris rasik semana semana ami estor mais modo ami faan la folin ami hanoin barak. Modo ami sosa US$ 60 ou 50 hanesan nee faan too loron tolu haat hanesan nee kinur ami soe tiha, tanba aat mak barak, ai-fuan sira nee mos hanesan dodok ami soe lae fo han fahi,” Felismina informa.
Negosiante nee konta, modo no aifuan hanesan tomate no seluk tan neebe nia faan kada semana sosa ho folin too US$ 60.00, maibe ema labele sosa hotu, tanba laiha kompradores nunee obrigadu sasan produtu neebe nia sosa balu too dodok hodi estraga deit, nunee husu Autoridade Munisipiu Baukau kria kondisaun hanesan hadia estrada no muda negosiante hotu-hotu ba merkadu foun Tuanau, hodi konsentra kompradores sosa sasan no modo iha fatin ida, tanba daudaun iha Baukau Vila hamosu merkadu haat mak hanesan merkadu ida iha rotunda Vila Nova, area edifisiu EDTL Baukau, Vila Antiga no Tuanaun.
Liga asuntu nee jornalista STL tenta konfirma Diretor Servisu Munisipal Jestaun Merkadu Munisipiu Baukau, maibe la fo komentariu ruma.
Jornalista: Tomas Reis
Editora: Carme Ximenes
