DILI, STLTIMORLESTE.com – Bolsa kandidatu profesores neebe antes nee Ministeriu Edukasaun (ME) koloka ona ba iha Munisipiu Ainaro, maibe tanba laiha rezidensia nunee nain 40 tenke aluga komunidade nia uma no balu komunidade oferese deit uma ba sira.
Kestaun nee hatoo husi Diretor Servisu Edukasaun Munisipiu Ainaro, Patricio da Costa Magnoba STL iha City 8.Manleuana, Sesta nee (25/04/2025).
“Hau hanoin ita nian bolsa kandidatu profesores neebe mak ba iha primeiru ita iha 42, segundu 43, sira maioria mak aluga deit uma, neebe 40 hanesan nee mak aluga uma, seluk ita seidauk hatene, tanba balun sei hela iha komunidade nia uma, tanba ita nian komunidade fo deit uma ba sira, tanba nee nain 40 mak aluga uma, dala ruma sira nain 2 ou 3 mak aluga hamutuk uma ida, tanba too agora ita seidauk iha rezidensia ba sira,” dehan nia.
Nia dehan, ezemplu uma boot ida sira nain4 ou 5 aluga hamutuk deit uma nee, nee sira selu hamutuk, ida nee mak ohin temi ona, profesores nain 40 mak aluga komunidade sira nian uma, maibe balun komunidade ajuda deit, fo uma mamuk ba profesor sira nee hela hodi halao sira nian servisu liu husi prosesu ensinu aprendizajen.
“Iha ami nian area neeba, ita presiza tebes sira atu bele hanorin ita nia oan sira, ho ida nee mak ita nian komunidade ida rua fo netik uma ba sira hela, nee duni daudaun nee ami nian profesores bolsa kandidatu neebe mak koloka ba Ainaro hamutuk 88, nee seidauk sufisiente, tanba iha eskola ida rua mak ita presiza atu aumenta tan profesores, luu-liu ensinu baziku no filial sira,” nia esplika.
Nia hatutan, bolsa kandidatu profesores ida rua mak muda fali mai Dili, tanba haree ba sira nian kondisaun saude la permiti, liu-liu sira feto neebe mai ho kondisaun ladun diak, husi urbanu sira tenke mai fali Dili, tanba haree feto ou jender nee, tanba nee husu ME atu aumenta tan profesores nain rua atu nunee bele kompleta ensinu baziku sira neebe mak sei menus profesores.
(jac)
