BAUKAU, STLTIMORLESTE.com – Tempu lansamentu fatuk dahuluk ba projetu reabilitasaun estrada urbana Baukau Vila, Autoridade Munisipiu Baukau sei hein piska matan husi Ministru Obras Publikas (MOP).
Tuir informasaun neebe iha, preparasaun ba implementasaun projetu reabilitasaun estrada urbana Baukau Vila, ofisialmente anunsiu husi Ministru Obras Publikas katak, daudaun nee prepara ona kontratu, maibe sei hein Primeiru Ministru nia tempu atu asina kontratu ba projetu refere.
“Estrada Urbanas Ermera nian halo ona, hau fiar katak Sr. Ministru sei baku matan piska oituan buat hotu hotu sei lao, mais dehan bainhira kestaun tempu deit, mais akontese sempre akontese,” hateten Prezidente Autoridade Munisipiu Baukau, Veneranda Lemos ba jornalista sira iha nia knaar fatin Vila Nova Baukau, Kuarta (28/01/2026).
Prezidente Autoridade Munisipiu Baukau Veneranda Lemos katak, loron fixu ba lansamentu fatuk dahuluk estrada urbana Baukau Vila nian seidauk iha, maibe sei implementa, tanba nee Autoridade Munisipiu orienta ona ekipa liu husi Sekretariu Munisipal Planeamentu Investimentu No Dezenvolvimentu no Asesor Munisipal atu halo preparasaun ba seremonia refere.
Maibe antes ekipa Munisipal halo preparasaun ba seremonia refere sei hein ekipa ida husi Ministeriu Obras Publikas atu koordena molok halo preparasaun, tanba nee Autoridade Munisipiu kontinua hein dezisaun husi Nasional.
“Hau hatene komunidade balu hirus, la gosta, mais ita jere administrasaun komunidade ida boot tenke pasiensia, sira bele koalia tarata hau, mais hau nafatin hadomi ita boot sira lori Baukau ba oin, bainhira too tempu Baukau nia estrada diak eletrisidade iha dalan sira nee lakan bee lao kapas hau hakarak haree sira sei hatete aat hau ga lae, por enkuantu hau simu ho fuan boot para ita hetan vitoria,” Veneranda komenta.
Eis deputada nee espresa, durante kompromete sira ba implementasaun projetu estrada urbana la akontese tuir planu neebe mak iha, hanesan Autoridade masimu iha Administrasaun Munisipal Baukau hetan kritikas ho lia kroat husi entidades sira iha publiku, maibe hanesan Autoridade simu ho pasiensia simu, tanba hakarak lori Munisipiu Baukau hetan vitoria.
(tom)
