BAUKAU , STLTIMORLESTE.com – Jeneral Reformadu, Lere Anan Timur hateten, Timor hakotu funu ikus ho inimigu invazaun Indonezia iha loron 30 Agostu 1999, maibe nia liman rohan sei iha Timor.
Lia hirak nee Lere Anan Timur hateten liu husi nia diskursu, bainhira partisipa iha seremonia segundu konferensia Konselhu Kombatentes Libertasaun Nasional Munisipiu Baukau, neebe realiza iha salaun sentru Konvensoens, Vila Antiga, Baukau Segunda (11/08/2025).
“Kalan kalan hau mehi inimigu serku, funu hotu ona nusa mak inimigu iha nafatin, hau hader hakfodak afinal mehi, mais dala ruma mehi nee realidade, ita manan funu iha 1999 30 de Agostu ho referendum, maibe dala ruma nia liman ain sei iha Timor, hau la fiar iha Timor hotu hotu gosta veteranu, balun hotar ita hakarak mate lalais, mais hau fiar, matebian sira, foho, fatuk ai lulik uma lisan sei tau matan atu ita kumpri misaun rua,” dehan LAT.
Nia sublina, ezistensia veteranu nuudar patrimoniu nasaun, maibe la fiar ema hotu iha Timor gosta veteranu sira, tanba dala ruma balu hotar veteranu sira atu mate lalais, maibe nee ilusaun deit, tanba martire sira, foho lulik, fatuk lulik no fatin sagradu seluk tan sei tau matan ba funu nain sira atu moris no kumpri misaun boot rua, husi misaun liberta patria liu ona no dadaun Timor-Leste sai nasaun ida livre no independente inklui iha faze ukun aan atu liberta povu husi kiak no mutik.
Nia salienta, iha faze ukun aan konsidera veteranu mak nain ba ukun aan no rin ba Nasaun, maibe tuir lolos nee FRETILIN mak nain ba ukun aan FALINTIL mak rin ba Nasaun, tanba tuir istoria, maibe Fretilin la ukun nunee veteranu mak nain ba ukun aan no rin ba nasaun.
Maibe kona-ba lidere seluk hanesan Mari Alkatiri, Francisco Lú-Olo, Taur Matan Ruak laos la ukun rai ida nee, maibe ukun husi tinan 1975 too ohin loron, tanba nee presiza Komando matan moos neon nain no lalika fo sala ba malu iha prosesu ukun aan nee, maibe fo liman ba malu hodi hadia povu nia moris.
(tom)
