DILI, STLTIMORLESTE.com – Deklarasaun Prezidente Republika (PR), Jose Ramos Horta neebe fo sai katak kandidatu PR 2027 tenki leal ba Primeiru Ministru (PM), Xanana Gusmão, hamosu kestionamentu juridiku husi parte akademista sira. Sira fo hanoin katak, iha Estadu Direitu Demokratiku, lealdade kargu nian mak ba konstituisaun, laos ba relasaun pesoal entre lider sira.
Liu husi entrevista ho Akademika UNPAZ, Jaimito Sarmento sublina katak, artigu 74 husi Konstituisaun RDTL define katak, Prezidente Republika hanesan simbolu no garante independensia nasional, unidade Estadu nian no funsionamentu loloos instituisaun demokratiku sira nian. Tuir nia, kriteiru lealidade ba figura bele soke ho knaar PR nian hanesan moderador neebe tenke neutral.
“Konstituisaun la temi katak PR tenke leal ba PM. Se ida nee akontese, funsaun kontrolu neebe PR iha ba Governu nian bele sai fraku. PR tenke leal ba lia loos no Lei, maski ida nee dalaruma kontra fali PM nia hanoin,” dehan Jaimito ba STL, iha Largo, Dili, Kuarta (25/03/2026).
Nia dehan, estabilidade neebe diak mak estabilidade neebe bazeia ba respeitu ba lei, laos ba akordu elite nian. Kandidatu Prezidente Republika (PR) 2027 tenki hatudu katak, nia iha kbiit atu defende povu nia interese, maski ida nee ezije nia atu Kritika ba lider seluk.
Iha sorin seluk, Prezidente Republika defende katak, ninia hanoin nee realista tebes tanba maun boot Xanana Gusmao sei nafatin sai figura sentral ba estabilidade Timor Leste (TL) nian. Ba Prezidente Republika, Ramos Horta, dezenvolvimentu la bele lao se Prezidente Republika no Primeiru Ministru la iha sinkronizasaun neebe metin, no lealidade mak dalan atu evita hirus malu iha governasaun laran.
(car)
