DILI, STLTIMORLESTE.com – Comicões Nacional das Eleições (CNE) sei halao sensibilizasaun ba lei Poder Lokal no Eleisaun Munisipal, atu nunee eleitores sira bele preparadu simu eleisaun.
Informa Odete Maria Belo, Komisaria Comicões Nasional das Eleições (CNE) katak, CNE iha planu halo edukasaun sivika hodi sensibiliza ka disemina lei eleisaun munisipal no lei poder lokal ba iha eletores sira iha teritóriu laran.
“Mezmu ita hatene katak implementasaun depende ba desizaun politika, liu-liu desizaun governu nian. Maibe CNE hanesan orgaun ida ho nia kompetensia fahe informasaun, neebe CNE kontinua halao no implementa lei poder lokal no lei eleisaun munisipal ba komunidade sira iha area rurais, nunee sira preparadu hodi simu eleisaun neebe akontese”, informa Komisaria CNE, Odete Maria Belo ba STL Tersa (115/10/2024).
Nia dehan, lei nee aprova no hetan promulga ona husi Prezidente Republika, neebe CNE ho nia kompetensia neebe iha tenke halao programa hodi halo edukasaun sivika ba iha 13 munisipiu inklui RAEO no Atauro. Neebe kada fulan sei halao sensibilizasaun dala rua iha munisipiu, ho nia tarjetu ba ema neebe tinan 16 ba leten tantu partidu politiku, Xefi Suku, Xefi Aldeia no estudante sira atu bele informadu hodi apar ho prosesu sisrtema eleisaun munisipal, nunee too implementa lei nee sira hotu preparadu.
Tuir nia, programa sensibilizasaun nee sei kontinua iha tinan oin, too iha desizaun ba munisipiu neebe preparadu tuir rekezitus, tanba eleisaun nee laos simultania, maibe fazeadamentu depende ba iha munisipiu neebe preparadu ona tuir rekezitus neebe iha.
(gui)
