DILI, STLTIMORLESTE.com – Lei numeru 5/2022 Estatutu Majistradu Judisial artigu 182 kona-ba nomeasaun, fo dalan atu loke konkursu Juiz Timoroan sai hanesan Inspetor hodi avalia Juiz sira nia servisu, maibe tenke iha preparasaun.
Tuir Prezidente Asosiasaun Majistradu Judisial Timor Leste, Antonino Gonsalves katak, iha artigu 182 nomeasaun, husi Estatutu Majistradu Judisiais fo dalan atu loke konkursu ba Juiz Timoroan sai hanesan inspetor.
“Tuir ami nia estatutu tenke loke konkursu ba Juiz Timoroan, tenke iha preparasaun hodi ba tur iha neeba, tuir lo-loos nee ita bele halo selesaun agora hodi servisu hamutuk ho Inspetor Internasional hodi manan pratika,” dehan Antonino ba STL iha nia knaar fatin Kaikoli, Dili, Tersa (18/02/2025).
Nia hatutan, oras nee iha deit inspetor internasional, Timoroan seidauk iha, maibe lei fo fatin atu loke konkursu, no selesiona ba ema neebe prienxe rekezitu, tenke domina lingua domina lei, nia valor muito bom. Liu husi selesaun se mak liu sei ba servisu hamutuk ho Juiz Internasional hodi manan pratika, ba iha liur akompanha Inspetor sira hodi halao servisu.
Iha fatin ketak, Jurista Sergio Dias Quintas dehan, lei fo dalan Timoroan bele sai Inspetor.
“Lei fo dalan ba Timoroan bele sai hanesan inspetor, tanba iha estatutu majistradu judisial define katak, wainhira sai inspetor tenke prienxe rekezitu balu,” dehan nia.
(ter)
