DILI, STLTIMORLESTE.com – Jurista Sergio Dias Quintas hatete, Inspetor ba iha Juiz sira mesak mai husi rai liur, maibe lei fo dalan ba Timoroan sira bele sai Inspetor.
“Lei fo dalan ba Timoroan bele sai hanesan Inspetor, tanba iha estatutu Majistradu Judisial define katak, wainhira sai Inspetor tenke prienxe rekezitu balu, ida mak tenke mai husi klase mais elevada signifika primeira klase, ” dehan Sergio ba jornalista STL iha nia knaar fatin, Dili, Kinta (14/08/2025).
Nia hatutan, karik Juizes Timoroan neebe iha ona primeira klase no iha ona abilidade ba servisu Inspetoria mak Konselhu Superior Majistradu Judisial bele nomeia nia ba Inspetor, mas nee depende ba deliberasaun husi Konselhu rasik.
Maibe hakarak Timoroan mak asumi papel ida nee tenke prepara ona rekursu umanu em termos de kapasitasaun no formasaun,” Por tantu ita labele depende ba ema estranjeiru deit, tempu too ona ba iha kualker setor Timoroan tenke kaer knaar ida nee,” dehan nia.
Iha fatin ketak, Prezidente Asosiasaun Majistradus Judisial Timor Leste, Antonino Gonsalves katak, iha artigu 182 nomeasaun, husi Estatutu Majistradus Judisiais fo dalan atu loke konkursu ba Juiz Timoroan sai hanesan Inspetor.
“Tuir ami nia estatutu tenke loke konkursu ba Juiz Timoroan, tenke iha preparasaun hodi ba tur iha neeba, tuir lo-loos nee ita bele halo selesaun agora hodi servisu hamutuk ho Inspetor Internasional hodi menan pratika,” dehan Antonino.
Nia hatutan, oras nee iha deit Inspetor Internasional Timoroan seidauk iha, maibe lei fo fatin atu loke konkursu no selesiona ba ema neebe prienxe rekezitus tenke domina lingua domina lei, nia valor muito bom. Liu husi selesaun se mak liu sei ba servisu hamutuk ho Juiz Internasional hodi menan pratika, ba iha liur akompanha Inspetor sira hodi halao servisu.
Aleinde nee Jurista Timoroan Jose Maria Guterres dehan, ohin loron Juiz Timoroan iha ona, prepara sira atu bele sai Inspetor.
“Ita iha Juiz Timoroan iha balu kapasidade iha duni, tanba nee loke konkursu ida neebe liu prepara hodi sai inspetor, hodi avalia servisu neebe iha,” dehan nia.
(ter)
