DILI, STLTIMORLESTE.com – Asesor Prinsipal Politika Prezidente Republika (PR), Jeneral Reformado Lere Anan Timur hatete, agora daudaun nia seidauk mehi atu kandidata aan ba PR.
Jeneral Reformado Lere Anan Timur hatoo kestaun nee ba STL, bainhira remata entrega sertifikadu rekonhesimentu ba partisipante sira neebe partisipa iha tinan 50 komemorasaun F-FDTL neebe halao iha Turiskai Mindelo, iha Palasiu Prezidensial Nicolau Lobato, Dili, Kinta (05/02/2026).
Jeneral Reformado Lere Anan Timur dehan, atu kandidata aan ka la kandidata aan ba Prezidente ba periodu 2027-2032 too tempu mak haree, maibe daudaun nee seidauk mehi atu kandidata aan.
“Hau atu kandidata ka la kandidata too momentu mak ita haree, agora nee hau seidauk mehi, ema seluk mak mehi maibe hau rasik nain nee seidauk mehi,” dehan Jeneral Reformado Lere Anan Timur.
Karik ema barak hakarak dudu Jeneral Reformado Lere Anan Timur ba Prezidente Republika oinsa Jeneral nia preparasaun, hatan ba kestaun nee Jeneral Reformado Lere Anan Timur hatete, ema barak mak mehi hakarak kandidata nia, maibe nain rasik seidauk iha mehi atu kandidata aan
“Ema barak nee mak mehi dehan katak atu kandidatu hau ba Prezidente, maibe hau nain nee seidauk mehi atu kandidata aan ba Prezidente,” dehan Lere.
Nia akresenta tan katak, daudaun nee seidauk mehi atu kandidata aan maibe tempu too mak foin haree bele kandidata aan ka lae.
(eme)
