DILI, STLTIMORLESTE.com – Jeneral Reformado Lere Anan Timur (LAT), Atual Konselheiru Polítiku Prinsipal ba Prezidente Republika husu joven sira kaer metin istoria nasional no unidade no patria.
Jeneral Reformado Lere Anan Timur (LAT), Conselheiru Polítiku Prinsipal ba Prezidente da Republika, J. Ramos Horta hatoo apelu forte ba juventude timoroan durante seminariu neebe halao iha Sols Bekora-Díli, Segunda (23/03/2026) ho tema “Unidade iha Diversidade ho Sentidu ba Patria”.
Durante eventu Jeneral Lere enfatiza importansia husi konsiensia istoria ba integridade no futuru nasional.
Lere sublina katak, lideransa lolos tenki harii iha komprensaun kona-ba sakrifísiu boot neebe halo ona iha tinan 24 nia laran durante luta ba independensia Timor Leste.
LAT hanoin fila fali momentu krusiais husi rezistensia, hanesan rekuperasaun ba identidade “Maubere”, too serku trajiku iha Foho Matebian iha 1978 no reorganizasaun krusial rezistensia nian iha 1981 neebe lidera husi Kay Rala Xanana Gusmão.
Jeneral alerta ba joven sira kona-ba perigu modernu husi korrupsaun no egoizmu iha senariu polítiku atual nian, fo hanoin sira kona-ba futuru lideransa, ministru, ofisial militar, no prezidente sira tenke hetan matadalan husi legadu neebe fo sira-nia vida ba liberdade nasaun nia.
“Se imi iha tentasaun ba korrupsaun, atu naok osan Estadu nian, imi tenki hanoin Uluk osan nee laiha, ita fo ita-nia ran hodi sosa ita-nia ukun rasik-an,” dehan nia.
Lere hatete ho fuan ba estudante sira. “Ohin loron la folin, se ita uza fali osan hodi sosa lideransa. Tanba nee mak importante tebes ba imi atu hatene istoria,” haktuir nia.
Seminariu nee, neebe konta mos reflesaun mai husi veterana Domingas Alves da Silva konesida ho Bi Lou Mali no Manuel Soares konesidu ho “Funu Lakan” neebe partilha sira-nia esperiensia no vizaun kona-ba luta ba independensia.
Eventu nee remata ho dialogu interativu ida kona-ba estratejia jeopolítika kompleksu neebe garante nasaun nia sobrevivensia Timor-Leste nian durante Funu Malirin. Alina ho vizaun Prezidente Jose Ramos-Horta nian ba nasaun ida neebe unidu no iha konxiensia istorika, intervensaun Jeneral Lere nian sai hanesan xamada profundu ida atu atua hodi juventude sira ativamente halo dokumentasaun, lee, no prezerva sira nia eransa kultural no istorika Timor Leste nian, neebe nafatin sai baze ba identidade nasional.
(eme)
