DILI, STLTIMORLESTE.com – Eis Xefe Estadu Maiór Jenerál Forsa Armada (XEMGFA), Tenente Jenerál Reformadu Lere Anan Timur husu ba joven sira atu estuda no kria pas hodi hatután FALINTIL sira nia mehi.
Nia hatete, iha tinan 50 liu ba konsege liberta povu husi okupasaun sai nasaun independente.
“Ohin ita komemora ezistensia FALINTIL ba dala 50, hodi aprende halo funu iha tinan rua nulu resin haat (24) nia laran. Agora joven sira saida mak sira atu halo fali mak estuda no kria pas para hatután fali mehi FALINTIL nian uluk, katak funu ba vizaun ida mak liberta pátria no liberta povu, agora joven sira estuda, estuda para aban bainrua dezenvolve ita nia rai sai diak liu tan,” hatete Eis Xefe Estadu Maiór Jenerál Forsa Armada (XEMGFA), Tenente Jenerál Reformadu Lere Anan Timur ba jornalista sira iha Tasi-Tolu, Kuarta (20/08/2025).
Nia fo omenajen ba eroi no eroina FALINTIL no ba hirak neebe fo sira nia aan ba mate hodi liberta ona Timor Leste sai nasaun independente.
“Hau fo hau nia omenajen ba erói no eroina sira, biar ami oituan mak fila mai vila laran, maibe ba sira neebe ohin laiha iha nee sira nee mak erói tanba barani fo sira nia vida ba povu no nasaun ida nee too ita konkista objetivu, ita tenke fo ondra ba sira,” nia esplika.
Iha fatin hanesan, Veteranu Custódio Belo “Alin Laek” informa, loron FALINTIL loron espesial ba lutu nasaun, lutu ba nasaun nee mai husi FALINTIL, tanba nee parabens ba eroi no martires sira neebe lakon nia vida ba rai ida nee.
“Loron ida nee loron espesial ba eroi no luta nain sira neebe lakon sira nia vida, fakar raan no lakon ruin ba rai ida nee mak ohin loron ita hetan ukun rasik aan, tanba nee parabens ba sira no ondra nafatin ba sira,” nia afirma.
(jen)
