DILI, STLTIMORLESTE.com – Asesor Polítiku Prinsipal, Prezidensial Republika, Jeneral (Ref.) Lere Anan Timur husu Universidade UNITAL sai matan dalan no livre husi politika partidaria.
Jeneral Reformadu Lere hatoo kestaun nee liu husi diskursu bainhira partisipa iha serimonia aniversariu ba dala-23 Universidade Oriental Timor Lorosae (UNITAL), neebe halao iha edifísiu Instituisaun nian iha Bekora, Dili, Segunda (27/10/2025).
Jeneral Lere fo kongratulasaun ba universidade ba etapa importante nee no sublina nesesidade krítika ba instituisaun nee atu sai nuudar matadalan ba exelensia akademika, livre husi polítika partidaria, bainhira prepara ninia estudante sira ba dezafiu no oportunidade sira husi adezaun Timor-Leste nian ba Asosiasaun Nasaun Sudeste Aziatiku (ASEAN).
Jeneral fo avizu makaas kontra politizasaun instituisaun akademika sira, hodi dehan katak UNITAL tenke mantein nuudar fatin neutral ida neebe dedikadu ba siensia no konhesimentu, laos palku ba manobra polítika.
“Universidade nia misaun loloos mak atu kultiva rekursu umanu ho kualidade neebe bele servi nasaun ho integridade,” dehan Lere.
Jeneral Lere destaka mos katak, pas no estabilidade interna mak fundamentu esensial neebe UNITAL bele harii reputasaun ida ba edukasaun kualidade no kontribui ho signifikativu ba dezenvolvimentu nasional.
Haree ba futuru, Assessor Prezidensial fo-sai dezafiu signifikativu sira neebe sei mai bainhira Timor-Leste integra aan iha komunidade ASEAN.
Lere apela ba lideransa universidade no estudante sira atu foku hodi dezenvolve rekursu umanu ho kualidade aas neebe nesesariu ba nasaun atu kompete no prospera iha nível rejional.
Jeneral Lere konklui hodi reitera ninia kongratulasaun no expresa konfiansa Prezidensia nian ba potensial UNITAL nian atu forma jerasaun foun líder sira neebe iha abilidade, etika no patriotiku, neebe sei gía nasaun nia progresu iha tinan sira tuir mai.
Jornalista: Emerenciana Pinto
Editora: Carme Ximenes
