DILI, STLTIMORLESTE.com – Jeneral Reformado Lere Anan Timur atual Asesor Prinsipal Politika Prezidente Republika hatete, oras nee daudaun partidu politiku sira hahu ona tun halo konsolidasaun, husu tenke hatudu etika iha publiku, laos ba insulta malu.
Jeneral Reformado Lere Anan Timur hatoo kestaun nee ba STL bainhira remata entrega sertifikadu rekonhesimentu ba partisipante sira iha Palasiu Prezidensial Nicolau Lobato, Dili, Kinta (05/02/2026).
“Hau hanoin katak nuudar politiku nee ita tenke halo politika ho etika, demokrasia la hanorin ita atu tolok malu trata malu, demokrasia hanorin ita katak iha liberdade opsaun, liberdade espresaun, no ita ba hili tuir demokrasia buat neebe ita prefere, demokrasia ba koalia saida mak ita hakarak koalia, laos ita ba koalia ema nia privasidade hotu,” dehan Jeneral Reformado nee.
Asesor Prezidente Republika nee dehan tan, diak liu tun ba terenu hatoo planu no programa neebe partidu politiku ida-idak iha ona, labele ba insulta fali ema seluk.
“Em ves ita preokupa ho ita nia situasaun, ita ba preokupa fali ema seluk nia situasaun, maibe hau hanoin ita nia povu ida nee matenek matan mos, se mak insulta ema, nia laiha krediblidade, laiha lejitimidade, tanba nia laiha razaun nee mak trata ema, tolok ema nee,” katak nia.
Lere hatete, ema neebe matenek ho maturidade etika hanoin katak iha kampanha hatoo mak nia programa, no koalia kona-ba vizaun no misaun bainhira asume kargu ruma liu husi konfiansa neebe povu fo ba nia, ida nee mak importante.
“Ita koalia kona-ba edukasaun, entaun uluk ita eskola nee aprende saida, pelumenus ami sira uluk la eskola laiha titulu tanba ho situasaun neebe eifisil, entaun nee eduka ona ami oinsa mak respeita malu koalia ho etika, ba matenek nain sira ita labele hanorin, maibe se kuandu ita trata ema signifika ita beik, ita la matenek, ita tama too ema nia privasidade sira nee hatudu momos, povu mos hatene dehan beik nee mak tama too ema nia privasidade, tolok ema seluk nee o too neebe mos o labele manan,” katak Lere.
Besik daudaun ona tama ba tinan politika, husu intelektual liu-liu matenek nain sira neebe ho ambisaun atu ukun, maibe ba iha publiku tenke sukat, koalia deit planu programa neebe iha, labele ba buka trata fali ema seluk iha publiku, nee hatudu la matenek.
(eme)
