DILI, STLTIMORLESTE.com – Tenente Jeneral Reformadu atual asesor politika Prezidensial Republika, Lere Anan Timur hatete, tempu Natal tempu neebe Jesus moris lori domin, iha loron importante nee lider sira presiza halo reflesaun.
Tenente Jeneral Reformadu Lere hatoo kestaun nee ba jornalista liu husi mensajen Natal iha nia knaar fatin, Farol, Dili, Tersa (23/12/2025).
Lere hatoo mensajen natal no tinan foun ba povu Timor-Leste tomak liu-liu foinsae sira katak tinan foun mai, ida-idak halo ninia reflesaun.
“liu-liu ba lider sira neebe harii nasaun ida nee, saida mak halo atu nasaun nee bele moris hakmatek, haksolok nia laran nunee lori dezenvolvimentu ba povu,” dehan Tenente Jeneral Reformado.
Asesor Lere dehan, hotu-hotu hatene katak, fulan Dezembru la kleur tama ona iha tinan foun, ba tempu nee halai lalais liu. Tempu halai liu hakarak, ambisaun, hanoin katak loron 365 nee buat ida neebe naruk.
Nunee, Lere hakarak dedika mos ninia mensajen ba povu, juventude Timor-Leste nian, tanba atu tama ba loron boot nuudar sarani natal neebe menino Jesus kosok oan mai mundu, atu mai salva povu husi kiak, mukit, husi konflitu.
Lere dehan tinan tuan atu fo tinan ba tinan foun, natal neebe atu mai iha loron 25 Dezembru, hakarak husu ba ema hotu liu-liu ba juventude, liu-liu ba politiku sira. Maibe, Nai Jesus kosok oan sei lori diame, domin mai ba hotu-hotu, nuudar nasaun ida neebe livre, indepedente, maibe joven liu, iha dezafiu no problema oi-oin, mais domin dezafiu neebe iha rasik sei rezolve.
“Liu tiha natal tama tinan foun, tinan tuan 2025 ba tinan foun 2026, tinan foun neebe mai tenke diferente, labele hanesan loron foun, fo fatin ba kalan, kalan fo fatin ba loron, maibe tenke iha diferensa. Tenke iha nia konteudu propriu, saida mak ita seidauk halo hotu iha tinan tuan, ita sei kompleta iha tinan foun, saida mak ita halo sala iha tinan tuan, ita tenke halo loos iha tinan foun ida nee mak importante liu ba ita nia ukun nain sira, ba lider sira, mos ba ita nia juventude, ba ita nia povu tomak, Entaun hau hanoin katak, ita nia ukun sira neebe uluk harii nasaun sei moris, sira la haluha, biar sira iha difikuldade, sira iha problema oi-oin, mais sira la haluha povu ninia sofrimentu, terus, barak mate ba ukun rasik an ida nee,” dehan Lere.
Tenente Jeneral Reformado Lere dehan ohin loron dala ruma asiste no rona, akompanha lider sira dala ruma se kotuk ba malu uitoan, dala ruma soe lia ba malu uitoan, hanoin diverjensia neebe normal iha kualker pais demokratiku. Mais tuir Lere hanoin katak tinan foun mai, ida-idak halo ninia reflesaun, liu-liu ba lider sira neebe harii nasaun ida nee, saida mak halo, atu nasaun nee bele moris hakmatek, haksolok nia laran nunee lori dezenvolvimentu.
“Ita nuudar Timoroan, sarani ita halo reflesaun iha loron natal, halo mos reforsa iha loron tinan tuan ba tinan foun ida nee mak importante, Diverjensia nee akontese nafatin, hau husu mos ba ita nia lider sira nee uluk harii nasaun ida nee, buka malu, besik malu, koalia ba malu, diskute ho onestidade, omildade, atu bele lori nasaun ida nee ba oin,” nia esplika.
Lere husu tan dala ida ba nai ulun sira, la barak ona, nain lima, nain neen, povu konfia sira nafatin, balun fronteira maritima, fronteira terrestre atu too ona konkluzaun, balun halo estratejia buat oi-oin, ida nee hanesan lider labele haluha, halo reflesaun, halo reflesaun diak iha tempu natal no halo reflesaun ba tinan tuan fo fatin ba tinan foun.
Lere husu labele hanoin deit halo festa, halo festa mos fator ida neebe motiva, fo haksolok, dezde sira uluk iha ailaran mos ema balun hanoin katak, bainhira tinan foun ka tinan tuan fo fatin ba tinan foun SIRA halo festa, dansa, hakuak malu tanis, tanba hanoin maluk sira neebe mate, hanoin maluk sira neebe iha villa terus, inimigu fo presaun makaas ba sira. Tanba, inimigu oho sira hanoin buat sira nee hotu, agora hanoin nafatin maluk sira neebe ohin loron la hamutuk, maibe sira neebe mate nee fo motivasaun ba. Liu-liu ba lider sira.
Iha biban nee Eis Xefe Estadu Maior Jeneral F-FDTL, parabeniza ba aniversariu Prezidente Republika (PR) Jose Ramos Horta neebe sei akontese iha loron Sesta (26/12/2025), kompleta tinan 76. Nunee Lere husu ba Nai Maromak, husu ba matebian sira, rai lulik, uma lisan fo saude no vida naruk ba nia.
“Aproveita momentu ida nee, hau hakarak fo parabens ba hau nia maun boot Prezidente Republika, Jose Ramos Horta, neebe loron ida, rua tuir mai nia halo tinan 76, dala ida tan hau nia parabens. Husu ba Nai Maromak, husu ba matebian sira, husu ba ita nia rai lulik, ita nia uma lisan fo saude, vida naruk ba nia” dehan Lere.
Jornalista: Emerenciana Pinto
Editor: Xisto Mendonça
