DILI, STLTIMORLESTE.com – Prezidente Atual Konselhu Imprensa (KI) Antonio Conceição Moniz Mali konsidera Liberdade Imprensa Timor-Leste tun, tanba jornalista sira hetan presaun uitoan bainhira halao knaar iha terenu.
Nia dehan, liberdade imprensa nee hanesan alvu ida ba sira atu atinji duni iha sira nia mandatu.
“Liberdade Imprensa neebe tun, hau sente situasaun Jornalista Timor nia hetan presaun uitoan, ida nee maka hau hanoin koko ho hau nia kolega konselleiru foun sira nee, ami koko oinsa maka atu ultrapasa presaun ida nee, para ba hau, hau hakarak hare tinan ida rua mai tan karik ita nia index liberdadeiImprensa ne pelumenus sae uituan ba, ba hau ida nee hau nia objetivu tebes,” hatete nia bainhira remata eleisaun iha Salaun KI, Kintal Boot, Dili, Kuarta (30/04/2025).
Nia haktuir, maski hasoru presaun maibe sira nafatin luta atu hasae kapasidade Jornalista sira nia, hodi publika notisia neebe maka kualidade diak.
“Primeiru hau hanoin hanesan buat ida neebe lao tiha ona, Konsellu Imprensa anterior sira halao esforsu barak ona, oinsa atu hasae kapasidade Jornalista sira nia, atu halo publikasaun ida ke tuir duni normas neebe iha, tuir duni kodigu dentolojiku jornalista nia, dalaruma ema halo presaun ba Jornalista, dalaruma media mosu oi-oin, tan platforma digital ida agora nee hotu-hotu hakarak hakerek notisia, hakarak kejar deadline ba mak dalaruma ita nia notisia nee bias tiha, hamosu mis-information, hamosu dis-information, tanba nee maka reasaun husi publiku liu-liu husi poder politiku sira bot tebes ,tanba dalaruma sira sente katak la representa sira nia interese, maibe ami hanoin tok bazeia ba buat neebe iha ona, hau hanoin atu melhora diak liu tan, maneira para responde ba presaun sira nee,” nia hatete.
Prezidente KI nee hatutan nia parte mos hasai zero toleransia ba parte Governo sira neebe dalaruma sempre limita jornalista sira nia knaar iha terenu, maibe buat hotu bazeia tuir lei neebe maka hatur tiha ona.
Nia parte mos halo ona akordu ho Polisia Nasional Timor Lorosae (PNTL) hodi bele asegura jornalista sira bainhira halao sira nia servisu iha fatin neebe deit.
“Ba hau zero toleransia ba buat sira nee, maibe buat sira ne ita halao tuir lei, ami nia servisu mos halao tuir lei, konaba intervensaun sira nee hau hanoin katak iha ona akordu ruma, ezemplu PNTL atu asegura jornalista ninia Liberdade no asegura halo kobertura iha neeba, ami sorti katak, ami mai buat hotu iha ona, lei sira iha uma, regulamentu sira iha ona, akordu sira iha ona, kooperasaun sira iha ona, hein hadia liu tan deit, hein mellor liu tan deit, oinsa ami ba oin ami atu trasa tok intervensaun sira neebe maka karik husi Governo iha,” nia haktuir.
Nia afirma dezafiu neebe maka iha mundu jornalizmu kontinua hasoru maka kualidade notisia, no nia husu ba media no Jornalista sira tenke hasae kualidade notisia, nia mos husu nafatin husu ba media no Jornalista sira liu-liu Konsellu Imprensa kontinua halao formasaun sira hodi garantia kualidade neebe diak.
Prezidente sesante Konsellu Imprensa(KI) Otelio Ote hateten, husi parte Konsellu Imprensa kontinua halo kooperasaun ho Sipisi Net hanesan rede ida iha Sudeste Asiatiku hodi asegura Liberdade Imprensa iha mundu inklui Timor-Leste.
“Ita kontinua koopera ho Sipisi Net, rede ida ba Konsellu Imprensa iha sudeste Asiatiku, atu bele tau hamutuk atensaun ba liberdade imprensa no kualidade jornalizmu iha nasaun sira inklui Timor-Leste ita iha Timor Leste,” nia hatete.
Liberdade Imprensa Timor-Leste iha 2022 pozisaun 10, iha 2023 iha pozisaun 20, ba tinan 2024 sei anunsia iha loron 2 Maiu 2025.
(est)
