BAUKAU, STLTIMORLESTE.com – Lider Komunitariu preokupa ekipamentu ba atendimentu saude nian, iha Postu Saude Afasa, Postu Kelikai Antigu, Munisipiu Baukau.
Tuir Xefe Suku Afasa, Joaquim Fernandes Ximenes katak, pesoal saude neebe destaka iha Postu Saude Afasa durante nee fo atendimentu diak ba komunidade sira neebe kondisaun moras halo tratamentu saude iha Postu Saude refere, maibe infrenta difikuldade, tanba laiha ekipamentu no falta ai-moruk.
“Atendimentu diak tebes, maibe ekipamentus ho ai-moruk hanesan Paracetamol no Amoxicilin mak menus, ekipamentus iha tempu partu parteira sira lori ba Laga se lae Baukau,” hateten Joaquim ba STL iha Vila Nova Baukau, Kinta (04/09/2025).
Tanba tuir nia, durante nee aimoruk hanesan Paracetamol no Amoxicilin laiha ba pasiente sira kauze fulan rua ona iha periodu nee, maibe atendimentu lao nafatin, tanba pesoal saude sira subtitui ho ai-moruk seluk neebe nia objetivu hanesan ba moras ida.
Enkuantu fasilidade ba inan isin gravida sira atu partu laiha, nunee durante nee parteira sira tenke transporta ba Sentru Saude Laga no fasilidade seluk tan hafoin fo atendimentu partu ba inan isin gravida sira.
“Ami preokupa tanba agora tempu bailoron moras barak tanba rai rahun makaas entaun labarik katuas ferik sira barak mak moras, se ai-moruk iha nee laiha ba sosa iha apotik Baukau,” nia katak.
Lideransa Komunitariu nee preokupa ho kestaun nee, tanba nia parte mos dala ida ona simu reseitas husi pesoal saude sirs iha Postu Saude refere hodi sosa ai-moruk iha apotika neebe lokaliza iha Baukau Vila.
Hatan ba kestaun nee, Diretor Servisu Munisipal Saude Baukau, Cristiano Belo hatete, Postu Saude la dependensia ba ai-moruk, tanba nia atendimentu ba saude kuidadu primariu neebe bele halo deit servisu sira hanesan akonselamentu no fo formasaun saude nian ba komunidade sira hodi labele kona moras.
“Ai-moruk nee laos stock laiha lae, ai-moruk iha balun deit mak laiha maibe exemplu stock neebe nia golongan hanesan neebe bele fo regras saude nee hanesan,” katak Cristiano.
Nunee mos Diretor nee hatete, kona-ba preokupasaun Autoridade Suku nian katak, inan isin gravida sira iha Postu Saude Afasa dala ruma transporta ba Sentru Saude Laga no Hospital Rejional Baukau, tanba razaun laiha ekipamentus nee klaru, tenke transporta, tanba ekipamentus neebe instaladu tuir nivel Postu Saude nian, nunee nesesidade transporta ba Sentru Saude, Hospital Rejional no Nasional hodi hetan tratamentu saude tuir kondisaun saude neebe enfrenta.
Entretantu Postu Saude Afasa iha parteira nain ida, enfremeiru ida no Voluntariu nain ida neebe nia atendimentu saude ba Suku Namanei, Gurusa no Afasa.
Jornalista: Tomas Reis
Editora: Carme Ximenes
