BAUKAU, STLTIMORLESTE.com – Ministru Administrasaun Estatal (MAE), Tomas do Rosario Cabral husu ba lider komunitariu sira tenke oferese dokumentus mai iha autoridade, nunee sai hanesan matadalan ida ba implementasaun ba programa sira neebe mak durante nee halao iha suku too iha munisipiu.
Lia hirak nee hatoo husi Ministru Administrasaun Estatal (MAE), Tomas do Rosario Cabral wainhira fo tomada pose ba estrutura suku tolu foun iha Baukau, Tersa (01/04/2025)
Ministru Administrasaun Estatal (MAE), Tomas do Rosario Cabral hatete, ba lideransa suku foun no membru konselhu suku tenke sevisu makaas hodi reoganiza fali suku ida neebe tuan mai iha suku foun, hahu servisu mesak ona, nunee dokumentu sira neebe iha tenke oferese mai iha autoridade.
“Imi tenke hahu ho servisu mesak, maibe bele koordena no fo hatene kolega sira seluk para bele ultrapasa tiha reorganizasaun, reorganizasaun ida nee laos fasil, nee difisil, xefe suku sira tenke oferese dokumentu sira mai iha autoridade hodi sai hanesan matadalan ida ba implementasaun,” katak MAE, Tomas Cabral.
Governante nee haktuir, ba Adminstrador Postu no lideransa suku tenke hatene mos total populasaun iha suku nee rasik, se ita sai ona lideransa suku mak la hatene total populasaun suku, ida nee sai hanesan problema boot mai ita.
“Se sai tiha aman ba postu administrativu no lideransa ba suku ida mak la hatene ninia populasaun nee mos konfuzasaun oituan, povu hein hela ita, povu la hatene sa mak atu mai,” katak MAE, Tomas Cabral.
Iha fatin hanesan, Xefe Suku Caibada Makasae, Julio Alegria Belo hatutan, orientasaun neebe husi ministru nia nuudar Xefe Suku foun nia prontu hodi koopera iha kualker pozisaun neebe mak iha, liu-liu oferese relatoriu ba iha autoridade.
“Kona-ba relatoriu sira, ami prontu para koopera kualker pozisaun saida deit mak iha hanesan atu ba foti dadus ka rekolha dadus ami prontu para koopera no prontu lori dadus nee ba iha postu administrativu, orientasaun husi ministru nee, ami nuudar Xefe Suku foun ba knaar neebe mak iha, ami tenke halo tuir no kumpri,” dehan nia.
(EST 2)
