BAUKAU, STLTIMORLESTE.com – Lideransa Komunitariu Suku Tirilolo, Postu Administrativu Baukau Vila, Munisipiu Baukau, husu Governu fo uluk indemnizasaun ba komunidade afetadu marka X molok sobu.
Xefe Suku Tirilolo, Elvino F. Belo hateten, ekipa konjunta husi Autoridade Munisipiu Baukau kuaze tau ona marka X ho kor mean ba uma komunidade no moru protesaun neebe komunidsde konstrui besik estrada publika, tanba konsidera okupa espasu publiku, nunee sinal neebe tau atu sobu hodi halo alargamentu estrada urbana Baukau Vila.
“Uma kain iha Tirilolo nee ita labele hatene nia total, maibe haree kuaze atu afetadu, tuir hau nia haree halo uluk negosiasaun ho komunidade sira no indemnizasaun ba sira bele buka fatin para atu hela,” hateten Elvino ba STL iha knaar fatin Tirilolo, Baukau, Segunda (14/04/2025).
Nia sublina, uma komunidade neebe ekipa konjunta tau marka X pertense ba Suku Tirilolo kuaze maioria nuudar uma privadu no komunidade sira hotu hotu kopera, tanba hakarak dezenvolvimentu ba alargamentu estrada publika husi Vila Antiga too Vila Nova, maibe too ohin loron seidauk iha informasaun kona-ba orienta komunidade afetadu loke konta bankaria hodi prosesu ba indemnizasaun inklui halo aprosimasaun ho komunidade afetadu.
Nia fundamenta, bainhira komunidade afetadu kopera ona programa Governu liu husi Autoridade Munisipiu ba alargamentu estrada, tenke halo aprosimasaun no atribui uluk indemnizasaun, nunee komunidade bele prepara hikas uma hela fatin, iha fatin seluk, bainhira uma konsidera okupa espasu publiku sobu, komunidade iha ona hela fatin no la hamosu dezentendimentu iha publiku.
“Nuudar Autoridade rekomenda ba Autoridade Munisipiu, halo uluk sosializasaun molok programa sira nee lao inklui mos fo uluk indemnizasaun,” Elvino rekomenda.
Komunidade afetadu marka X iha Suku Tirilolo, Sabina da Costa hateten, sinal X marka husi ekipa konjunta neebe lideradu husi Autoridade Munisipiu Baukau ba uma besik estrada publiku, konsidera okupante espasu publiku, maibe atu sobu tenke fo uluk indemizasaun, tanba nee sobu uma hela fatin.
“Ami hakarak nee fo uluk indemminizasaun mak sobu, maibe sira tau tiha sinal too ohin loron seidauk fo informasaun,” katak Sabina.
(tom)
