DILI, STLTIMORLESTE.com – Komemora tinan 51 disolusaun ASDT ba FRETILIN, lideransa Troika Francisco Guterres Lú Olo, Mari Alkatiri, Lere Anan Timur hamutuk ho estrutura FRETILIN realiza konferensia, hodi hatoo mensajen saudasoens ba povu Timor Leste (TL) hotu iha rai liur no rai laran.
Iha konferensia Imprensa nee Prezidente Partidu FRETILIN, Francisco Guterres Lú Olo hatete, ohin lideransa FRETILIN Troika FRETILIN marka prezensa iha nee, atu hatoo mensajen saudasoens ba kuandru no militante FRETILIN nian, iha data komemorativa ASDT ba FRETILIN nian, nomos aproveita oportunidade ida nee hodi hatoo mensajen saudasoens ba povu tomak.
“FRETILIN marka nia istoria ida iha tempu ketak ketak iha konjuntura politika ketak ketak, maibe dala uluk liu hakarak atu hatete katak ASDT neebe orsida kamarada Sekretariu Jeral sei bele haklake diak liu tan, hau bele klasifika hanesan Timoroan sira iha tempu neeba akompanha situasaun politika hotu hotu liu ba potensia kolonilazadora Portugal nian nomos funu neebe sira halo ho maun alin sira iha rai Afrika nian, Grupu ida nee bele hola akompanha situasaun sira nee hotu, sira forma dadaun movimentu ida ou asosiasaun ida nee para halibur idea hanoin hamutuk oinsa maka prepara Timor Leste nia futuru iha Asosiasaun Demokratika Timorense nia laran, iha ideas oin oin neebe Timoroan sira fo ba malu para atu hili ida neebe diak liu,” dehan Prezidente Partidu FRETILIN, Lú Olo liu husi konferensia imprensa, neebe halao iha salaun CCF, Fatuhada, Dili, Kinta (11/09/2025).
Eis Prezidente Republika nee deklara, FRETILIN iha loron 1- 11 fulan Setembru husi ASDT nian mak mai fo naran ba FRETILIN nuudar organizasaun politika ida neebe ho nia programa konkreta, no nia objetivu neebe define loloos iha nia programa katak indepedensia mak dalan loos liu ba Timor- Leste.
Hahu husi nee Lú Olo dehan, FRETILIN assume nia lideransa tomak kona-ba futuru Timor Leste nian, FRETILIN kumpre nia komprimisiu ida nee liu husi period 3 ka 4 neebe importante tebes, periode ida entre Timoroan sira iha konflitu, periodu ida seluk mak proklamasaun unilateral Timor Leste nian iha 28 Novembru tuir fali fali invazaun Indonezia nian mai Timor Leste nee FRETILIN assume papel importante halo rezistensia hasoru okupasaun militar Indonezia hamutuk ho liman kroat FRETILIN, no povu maubere sae ba foho leten ho lideransa FRETILIN nian para bele oferese rejistensia.
Deklarasun hanesan hatoo mos husi Sekretariu Jeral Partidu FRETILIN, Mari Alkatiri katak, FRETILIN halo tinan 51, tinan 50 halo iha tinan kotuk, maibe organizasaun rua ke uluk FRETILIN uluk kria maibe ida laiha ona, halo tinan 50 loloos mak ida mak OPMT halo iha 28 Agostu, ida mak organizasaun popular da juventude Timor sai abut ba organizasaun oin oin neebe ohin loron iha.
“Tinan 51 no tinan 24 iha rezistensia total, para apoiu atu kore ita nia aan husi dominasaun hahukcolonial, maibe naruk liu kolonial Japones, tinan 24 ba ida nee tinan 3 hamutuk maizumenus ho Nasoens Unidas iha trazisaun no tinan 23 iha faze restaurasaun indepedensia iha rekostrusaun nasional, tanba nee hau sei la koalia barak,” dehan Mari Alkatiri.
Entretantu Jeneral Reformadu, Lere Anan Timur afirma,FRETILIN mak nain ba ukun rasik aan, se FRETILIN laiha veteranu laiha.
Tanba FRETILIN luta ho objetivu ida mak mate ka moris ukun rasik aan, no luta atu liberta patria no liberta povu husi kiak no mukit.
Jornalista: Emerenciana Pinto / Alberto Menezes
Editora: Carme Ximenes
