DILI, STLTIMORLESTE.com – Diretor Jeral Servisu Rejistu Notariadu, Agostinho Gonsalves hatete, rede ka lina internet neebe la diak afeta ba sistema ajendamentu online ba pedidu emisaun, renovasaun pasaporte no seluk tan.
“Iha problema oituan mak liga ho rede internet neebe iha, maibe atendimentu ajendamentu online nee kada loron simu 140, kuandu nakonu ona entaun sistema save aan no hein fali loron tuir mai,” dehan Agostinho ba jornalista STL iha nia knaar fatin Kolmera, Sesta (05/09/2025).
Diretor nee afirma, durante nee ajendamentu Online lao diak, maibe tanba deit lina internet entaun afeta ba atendimentu ajendamentu Online nee, maibe kuandu problema sira buka rezolve kedan.
Aleinde nee nia mos dehan, laos ba ajendamentu Online deit, maibe dala ruma atendimentu Pasaporte liuliu hasai foto nee mos hetan difikuldade.
“Haree ba ita nia ahi eletrisidade dala ruma mate derepente depois lakan, entaun afeta ba ita nia atendimentu sira nee dala ruma pauza too minutu tolu nulu (30) hafoin ida nee, no kontaktu tekniku sira ministeriu nian hodi halo kedan intervensaun nunee, kontinua halo atendimentu ita nia ema sira,”dehan Agostinho.
Diresaun Servisu Rejistu Notariadu tuir Agostinho dadaun nee iha ona jerador no agora tekniku sira halo ona manutensaun, ba oin kuandu ahi mate jerador nee lakan automatika hodi nunee Notariadu kontinua fo atendimentu ba sidadaun sira.
Iha fatin ketak, Komunidade Suko Komoro, Afonso Da Costa dehan, atendimentu Online nee, foin lalais sira rejista maibe la simu ida.”Ami atu rejista maibe sistema la simu ida, la hatene ida nee tanba sistema maka nakonu ona ka, rede internet maka halo nunee, “dehan nia.
Jornalista: Terezinha De Deus
Editora: Carme Ximenes
