DILI, STLTIMORLESTE.com – Komemora loron 20 Maiu sai hanesan loron importante ida, tanba liu husi loron nee mak Timor Leste tau nia aan hanesan Estadu Soberanu.
“Ita selebra loron 20 Maiu, loron nebe importante tebes ba Timor Leste nuudar nasaun ida iha mundu rai klaran, liu husi 20 Maiu mak Timor Leste tau nia nia aan hanesan estadu soberanu ida no iha dignidade hanesan ho nasaun seluk seluk,” dehan Jurista Sergio Dias Quintas ba STL iha Dili, Segunda (19/05/2025).
Nia hatete, ohin loron ukun aan ona iha dekade rua resin ona, dinamika dezenvolvimentu lao hela tuir ukun nain sira nia perspetiva, iha setor justisa buat balu neebe presiza hadia mak liu-liu haree ba estabelesimentu Supremu Tribunal Justisa.
Sublina, nee mak politika Governu nia haree ba infraestrutura fizika atu nunee kondisaun hodi harii STJ. Ida seluk mak melhor prestasaun servisu tribunal nia hodi fo justisa ida dignu ba sidadaun neebe buka justisa.
Esplika tan, povu Timor Leste maduru ona, tanba nee mak uma vez que ohin loron numeru kiak no dezempregu sei boot hodi hamosu injustisa, maibe populasaun la halo revolta ba politika Governu nia. Ita moris hakmatek nee signifika populasaun maduru iha aspetu seguransa nasaun nian, ida nee importante tebes ba dezenvolvimentu nasaun.
Iha fatin ketak, Akademiku Sebastião dos Santos dehan, loron 20 Maiu sai hanesan loron istoriku, tanba nee kada tinan tenke selebra.
“Hau hanoin loron nee importante tebes, tanba nee kada tinan tenke selebra iha loron nee hodi hanoin hikas fali kona-ba saida mak akontese iha momentu neeba,” dehan nia.
Nia hatutan, loron nee hanesan Timoroan labele haluha loron ida nee, tanba loron nee sai hanesan loron istoriku.
(ter)
