DILI, STLTIMORLESTE.com – Manual Pre Kazamentu neebe mak ohin halo lansamentu husi Rede Feto no Sekretariu Estadu ba Igualdade no Uniaun Europeia no igreja, ida nee ajuda oinsa mak bele halo prevensaun ba violensia bazeia ba jeneru no violensia domestika iha familia.
Tuir observasaun neebe mak STL hetan iha loron Teresa nee (05/11/2024) katak, Rede Feto Timor Leste hamutuk ho reprezentante Igreja, Sekretariu Estadu ba Igualdade, Elvina Sousa Carvalho lansa Manual Pre Kazamentu nee iha topiku jeral 6 hanesan motivasaun no espetativa moris hamutuk iha uma kain ida, igualdade jeneru tuir perspetiva Biblia, feto no mane apoiu malu iha uma kain, orsamentu familia, violensia domestika no saude reprodutiva.
Iha kada topiku kompleta ho nia objetivu neebe hakarak atu atinji introdusaun ba fasilitador kona-ba asuntu espesifiku neebe atu fo durante sesaun durasaun tempu no faze neebe presiza tuir durante prosesu fasilitasaun.
No manual Pre Kazamentu sei uza hodi apoiu igreza fornese imformasaun ka formasaun jeneru no ekonomia familia ba parseru sira neebe partisipa iha Doutrina esplikasaun atu simu sakramentu matrimonia. Manual nee mos kria liu husi konsultasaun ho Parokia Saun Jose Aimutin Dioseze Dili ho Parokia Maliana no Dioseze Bobonaro.
Iha biban nee, Sekretariu Estadu ba Igualdade, Elvina Sousa Carvalho hatoo apresiasaun ba Rede Feto ho parseiru neebe lansa ona manual Pre Kazamentu.
“Hatoo apresiasaun bai ta boot sira tanba lansa livru ida neebe importante tebes livru nee kontribui bele hamenus violensia bazeia ba jeneru iha familia tanba kuandu hakat ba kazamentu iha preparasaun klean bainhira iha koinesementu neebe mak klean konaba direitus dever no iha koinesementu konaba lei kontra violensia bazeia ba jeneru hau hanoin nee importante, apresia ba igreza bele hola parte ita hamutuk atu bele kontra violensia bazeia ba jeneru,” katak nia.
Sekretariu Estadu ba Igualdade hetete, parte hotu presiza hamutuk luta kontra violensia bazeia ba jeneru, tanba luta ida nee boot tebes, tanba maioria violensia neebe akontese violensia bazeia ba jeneru ka violensia domestika komete husi parseiru intimu ka ema sira neebe sira fiar no konfiansa ba.
“Formasaun neebe husi parte igreja no kontribuisaun igreja importante atu muda hanoin no muda mos sosiedade nia hanoin,” katak nia.
Nia mos husu nafatin ba ADRA no Uniaun Europeia hamutuk empodera ekonomia feto fo sira poder atu bele foti desizaun iha uma laran no fo sira poder atu hatene jere sira nia osan rasik hodi bele foti desizaun no bele koalia.
Prezidente Konselhu Diretoria Rede Feto Timor Leste, Zelia Fernandes lansa livru Pre kazamentu nee atu prevensaun ba violensia bazeia ba jeneru no violensia domestika.
PR RFTL hatete, durante nee iha enkuadramentu legal oin-oin iha ona hanesan lei kontra violensia domestika no iha mos projetu spontline hodi kontribui ba prevensaun violensia bazeia ba jeneru sosializasaun sira no komferensia sira no seminariu neebe mak realiza ho hanoin atu kontribui ba prevensaun.
“Durante nee iha komferensia oin atu prevene violensia bazeia ba jeneru maibe ida nee hotu ita haree kazu violensia domestika kontinua mosu entau parte ida nee ami hanoin katak importante mos oinsa mak bele integra ka koopera parte igreja nia ba programa pre kazamentu, tanba iha igreja antes ema ba kazamentu sira liu husi formasaun antes ba kazamentu, ida nee interesante, entaun oinsa manual pre kazamentu nee kombina entre valores relizaun no valores familia nia oinsa hametin familia no kulturalmente,” katak nia.
Nia hatete, kombina valores rua nee atu reforsa tan ninia prevensaun violensia bazeia ba jeneru depois iha tiha materia nee halo konsultasaun ho parokia aimutin no no Dioseze Maliana rasik no bainhira halo konsultasaun iha rezultadu neebe diak kuaze konselhu pastoral sira apresia ho inesiativa ida nee bele kombina ho formasaun neebe halo iha igreja nia.
No husi parte igreja mos fo hanoin ida katak oinsa mak manual ida nee bele integra ho topiku rua mak saude reprodutiva no violensia bazeia ba jeneru no oinsa mak bele integra ka reforsa tan manual pre kazamentu nee.
“Entaun ita akomoda hanoin sira nee hotu no ita hahu ona halo intrudusaun ba iha manual ida nee iha parokia balun haree iha apresiasaun diak ba iha inisiativa ida nee liu liu ba manual ida nee no iha tempu badak sei habelar tan neebe manual ida nee laos hela deit iha nee maibe manual ida nee bele utiliza iha formasaun neebe mai,” katak Zelia.
Nia hatutan, violensia bazeia ba jeneru no violensia domestika nee laos tutur baku malu deit, maibe mai husi komunikasaun neebe la harmonia iha familia desrespeitu ba malu iha familia laran, mezmu halo juramentu iha igreja maibe nu fim sei baku malu, entaun manual pre kazamentu ida nee reforsa oinsa mak hametin fee familia nia fiar no respeita malu no koinese mos orgaun reprodutivu neebe presiza prevensaun.
Nia hatutan, sei kontinua halo komunikasaun parte igreja oinsa mak bele introdus parte igreja nia.
(eme)
