DILI, STLTIMORLESTE.com – Ministeriu Edukasaun (ME) rekonhese maioria estudante seidauk uza farda eskola no daudaun nee iha faze lobi kompanhia neebe produs farda ba estudante sira.
“Uniforme nee sosializasaun lao nafatin hela no eskola balun mos lao tiha ona, tanba eskola balun uza tiha ona farda nee, eskola iha nível teritoriu tomak ita seidauk uza hotu, maibe maioria eskola barak seidauk uza farda, agora iha faze lobi hela ho kompanhia sira atu nunee kompanhia sira bele produs ona farda sira nee. Kona-ba presu nee tuir tarjetu ba presu,” dehan Ministru Edukasaun Interinu, Domingos Lopes Lemos ba jornalista sira, Kuarta nee (02/04/2025).
Nia dehan, farda nee bainhira sai bele fo kmaan no la hanesan ho tinan hira liu ba, agora daudaun nee fo presu, maibe diak para inan aman sira bele haree, farda nee iha rua, nee duni tenke haree didiak farda nee.
“Farda nee iha rua, hanesan ba sekundariu karik uniforme regular ou ba tekvo sira tenke makaku,” nia esplika.
Iha fatin hanesan, Deolindo da Cruz nuudar Diretor jeral Ensinu Sekundariu Jeral no Ensinu Tekniku Vokasional dehan, kona-ba presu masimu ba farda eskola ninia, foin hasai diploma para labele fo todan ba inan aman.
“Ninia presu masimu nee ita foin hasai diploma para labele fo todan ba inan aman estudantes sira,” nia haktuir.
Iha fatin seluk, Diretor EBC Manleuana, Carlos Correia hatete, husi parte eskola hein deit, estudantes sira seidauk uza farda eskola, sira sei uza nafatin farda anterior nian neebe antes nee sira uza ona.
“Ami nian estudantes sira uza nafatin farda tuan, tanba too agora seidauk uza uniforme neebe ME lansa ona iha tinan kotuk,” nia afirma.
(jac)
