BAUKAU, STLTIMORLESTE.com – Grupu komunitariu neebe jere projetu reabilitasaun eskritoriu unidade ida iha Eskola Sekundaria Jeral (ESJ) 01 Tirilolo Baukau, la konsege selu dividas ba loja Manudare, tanba loja aplika folin material konstrusaun ba projetu refere ho orientadu.
Projetu reabilitasaun eskritoriu iha ESJ 01 Tirilolo, husi Projetu Konstrusaun no Reabilitasaun Infraestrutura Edukativa ho naran (PKRIE) ka projetu komunitariu, neebe implementa iha tinan 2023 no remata liu ona tinan, maibe seidauk entrega ba eskola hodi utiliza, tanba seidauk selu dividas ba loja Manudare neebe fornese material konstrusaun ba projetu refere ho valor orsamentu hamutuk US$ 17,592.74.
“Hau hakarak hatoo infomasaun importante ida katak, foufoun ami enkontru ho ekipa Edukasaun Munisipal, sira haruka ami ba foti sasan iha loja indikadu, katak loja Manudare nee mak iha Baukau presu baratu liu, depois mosu problema ami halo aprosimasaun ho loja Manudare hatan katak, ita boot sira nia ekipa mak fo hatene presu, entaun presu neebe aloka, presu orientadu,” hateten Prezidente grupu komunitariu, José Clementino da Silva ba jornalista iha Tirilolo, Kuarta (30/04/2025)
Prezidente grupu komunitariu implementa projetu reabilita eskritoriu iha ESJ 01 nee haktuir, presu orientadu katak nian ba loja Manudare husi ekipa balun mak tenta fo hanoin ba loja Manudare aplika folin material konstrusaun hanesan sementi kada saka US$ 6.50, maibe presu iha loja seluk kada saka, folin US$ 4.50 no US$ 4.75, nunee dividas Manudare seidauk selu.
Nia hateten, loja Manudare fornese material konstrusaun ba projetu reabilita eskritoriu iha ESJ 01 Tirilolo, tanba kontratu husi Enjineiru kolokadu no Tekniku Edukasaun Munisipiu, maibe tuir loloos projetu refere, komunidade mak responsabilidade no grupu komunitariu mak halo aprosimasaun ho loja hodi fornese material, tanba tuir mata dalan implementasaun, maibe Enjineiru kolokadu no Tekniku Edukasaun Munisipal mak halo fali negosiasaun ho loja fornese material, nunee hamosu problema too projetu eskritoriu seidauk entrega.
“Manudare nia orsamentu metade iha ami, Manudare kria problema ho ami, tanba ami la konsege selu, tanba osan neebe iha Banku nee mos menus hela la atinji ezisjensia neebe Manudare fo mai ami,” katak Prezidente grupu komunitariu
Nia informa, dadaun la konsege selu dividas iha loja Manudare, tanba orsamentu neebe restu iha Banku pur-volta rihun US$ 13 kompostu fundu reabilita no retensaun la sufisiente atu kobre dividas iha loja Manudare ho montante US$ 17,592.74.
Nia haktuir, dividas refere parte Prezidente grupu komunitariu aprosima ona ho Enjineiru kolokadu atu fo solusaun, maibe Enjineiru kolokadu hatene, katak pesoal tekniku husi Edukasaun Munisipal mak hatene asuntu nee.
“Ami halo ona aprosimasaun lubuk ida, ba iha ekipa Edukasaun Munisipal maibe la dun iha solusaun, prezisamente ema nain tolu nia prezensa nunee bele buka solusaun ba problema neebe hasoru, maibe ate adata ami la hetan kontaktu husi Enjineiru kolokadu nomos ekipa Edukasaun Munisipal,” Prezidente grupu komunitariu nee katak
Enjineiru kolokadu ba projetu reabilitasaun eskritoriu iha ESJ 01 Tirilolo Buakau mak pesoal inisial H no tekniku Edukasaun Munisipal pesoal inisial E.A ho F.C.B.
Projetu reabilitasaun eskritoriu iha ESJ 01 Tirilolo Buakau nee Governu liu husi Ministeriu Edukasaun preve orsamentu liu rihun US$ 50 aloka ba fundu kontejensia rihun US$ 3 no rihun US$ 47 aloka ba servisu reabilitasaun eskritoriu unidade ida kompostu sala ida no kuartu rua, maibe dividas iha loja Manudare hamutuk rihun US$ 17,592.74.*
(tom)
