DILI, STLTIMORLESTE.com – Loja SEARA faan naan manu aten neebe mak expire ka liu prazu no falsifika tinan katak, hahu husi tinan 2021 too 2022, maibe falsifika tau fali ba tinan 2024.
Inspetora AIFAESA, Odete da Silva Viegas hatete, keixa nee hatoo husi konsumidores sira hahu husi hori kalan sira halo kompras iha loja SEARA i hetan katak naan manu neebe faan expire tiha ona.
“Depois ami rona informasaun ohin dader nee ekipa operasaun terenu tun kedas mai loja SEARA hetan duni katak, iha naan manu neebe mak expire, ida tan mak falsifika, signifika katak falsifika nee hahu husi tinan 2021, 2022 sira falsifika fali tau ba tinan 2024, ida nee ita haree katak sira komete infrasaun neebe mak grave,” hatete Inspetora AIFAESA, Odete da Silva Viegas ba jornalista sira iha Loja SEARA Pantai Kelapa, Kuarta nee (23/10/2024).
Normalmente prosesu husi AIFAESA nian iha diresaun neebe responsabiliza ba servisu inspensaun no fiskalizasaun mak Diresaun Operasional tun iha terenu hetan foti dosis ohin mensiona, sei hatoo relatoriu ba iha departamentu juridiku, depois juridiku sei halo paraser ba iha inspetor sei haree katak, infrasaun neebe sira komete nee nia gravidade nee oinsa para bele foti sansaun ba kompanhia ka loja neebe komete irregularidade nee.
Tanba tuir observasaun STL iha terenu katak, sira komete infrasaun nee grave, laos foin primeira vez akontese komete eru nee, maibe akontese iha tinan hirak liu agora akontese ba dala 3 ona, nee signifika katak ema hirak neebe mak konsumu tiha ona aihaan sira nee, fo mos risku umanu nee fatal.
Nia dehan, se loja hatudu nafatin hahalok hanesan nee, posibilidade AIFAESA bele taka loja temporaria fulan 1 ou too fulan 3, kuandu sira kumpri fali ona regra neebe AIFAESA no SERVE fo depois bele hahu fali atividade negosiu, ida nee bolu atensaun ba komersiantes hotu-hotu.
Maibe la hatene loja sira seluk, infelizmente ekipa AIFAESA halo servisu regular iha terenu, atu bele indentifika karik iha komete eru iregularidade infrasoes ruma hodi hetan sansaun.
Nain ba loja nee ema Malazia, agora loja nain laiha fatin iha liur, nunee ohin hasoru Manajer deit.
Normalmente sira hetan infrasaun sira selu koimas mak osan nee, maibe kuandu sira komete irregularidade hanesan nafatin la taka dalan atu taka sira nia loja provizoriu.
Kona-ba koimas hahu husi US$ 250 bele too rihun, depende ba gravidade neebe mak loja nain komete.
Iha Fatin hanesan, Manejer SEARA, Engelbertus Babulu rekonhese katak, sira labele nega katak naan manu neebe expire tiha ona nee los, tanba data iha tinan 2021, 2022, agora husi AIFESA kaer toman ona, sira nia parte rekonhese sala nee ladun diak.
Tanba fo risku ba konsumidores neebe konsumu naan manu neebe rick back rekonhese sala, nunee sansaun saida husi AIFAESA fo prontu simu.
(joa)
