DILI, STLTIMORLESTE.com – Tribunal Judisial Primeira Instansia Dili (TJPID) kontinua halao prosesu julgamentu ba krime pekulatu neebe deskonfia envolve husi arguidu nain tolu (3) hanesan membru Polisia Nasional Timor Leste (PNTL) ho inisial BdJ, LLG no DM hodi rona deklarasaun husi sasin.
Prosesu refere Tribunal koletivu rona ona deklarasaun husi arguidu sira no sasin balu, tanba nee iha julgamentu kontinuasaun nee, Tribunal rona deklarasaun husi sasin Longuinhos Monteiro.
Iha sala julgamentu, sasin Longuinhos Monteiro deklara ba Tribunal katak, momentu neeba (2013) sasin hanesan Komandante Jerál PNTL, hetan orientasaun husi Ministru Defeza katak Governu sei halo serimonia natal konjuta iha Oecusse.
Sasin deklara, hanesan Komandante Jerál PNTL hafoin simu tiha orientasaun referida konvoka kedas enkontru ho parte PNTL no F-FDTL hodi forma ekipa komisaun organizadora ba eventu natal konjuta ida nee.
Sasin deklara, momentu neeba atividade lao, ahi iha Oecusse mate, no sasin fo ordem ba Diresaun Lojistika PNTL atu haree oinsa abaste mina ba jerador neebe iha hodi fornese eletrisidade ba fatin festa atu lao ho diak.
Konfirma kona-ba abastamentu Kombustivel ba iha kareta Privadu, sasin deklara nia parte la iha konhesimentu kona-ba ida nee, tanba momentu neeba sasin orienta katak mina neebe mak iha nee so ense deit ba kareta militar no polisia atu halo kontrolu hodi fo seguransa ba fatin neebe iha.
Tribunal konfirma kona-ba abastamentu kombustivel ba kareta privadu hetan autorizaun husi se, kona-ba ida nee sasin deklara nia parte la iha konhesimentu, ida nee Xefe Lojistika iha momentu neeba mak hatene.
Sasin deklara tan, laos sasin mak fo autorizasaun atu ense mina ba iha kareta privadu.
Sasin hatutan, abastesimentu ba jerador no kareta ofisial Governu nian, kareta Forsa no PNTL atu asegura atividade festa natal konjuta iha Oecusse, atu asegura festa nee lao diak, maibe ense mina ba iha kareta privadu sasin la iha konhesimentu.
Rona tiha sasin, Tribunal adia ba loron seluk.
Iha indisus sufisiente katak, Sekretaria Estadu Seguransa aprezenta relatoriu audit halao husi Gabinete Inspesaun no Auditoria, konaba dividas PNTL ba iha Kompania TOLL Timor Leste ligadu ho strattamentu kombustivel iha fulan Fevereiru nomos Marsu tinan 2013, akontese iha Lojistika Nasional.
Aprovisionamentu PNTL asina kontratu ho kompañia TOLL Timor Leste fornese kombustivel hahu husi loron 01 Janeiru 2013 too 31 Marsu 2013.
Rezultadu inspessun refere detekta, abastamentu kombustivel ba iha fulan Fevereiru tinan 2013, ba iha kareta tanki matrikula 02-3246, ho kapasidade 3000 litrus atesta ho total 6,720 Ltrs de gazoel, tuir GIS-SES iha indikasaun naok.
Rezulta katak, arguidu LLG, DM no BdJ servisu hamutuk hodi hasai mina husi kompanhia TOLL Timor Leste, no atesta oituan deit iha tanki mina PNTL, no mina barak mak arguidu sira faan no osan sira fahe ba malu.
Total kombustivel fornese husi Kompanhia TOLL Timor Leste iha fulan Fevereiru 2013 ho total 6,720 ltrs gazoel ho total osan US$ 9, 818,07.
Indisia katak kombustivel fornese husi Kompania TOLL ho kapasidade 6,613ltrs ho osan US$ 8,336.90 atesta iha fulan Marsu 2013 arguidu LLG tula balun ba fan nomos balun ense ba iha tenki sira.
Iha loron 17 fulan Janeiru tinan 2014 membru PNTL, Lojistika Nasional LLG no DM lori kombustivel Gazoel no Gasolina entrega ba iha UPF iha Oecusse la tuir kapasidade neebe maka sira solisita.
Iha loron refere kompañia UPF Charli Enklave Oecusse simu deit kombustivel Gazoel 620 litrus no Gasolina 500.
Tuir invois total kombustivel no Gazolina 3000 Litrus ho detailu kombustivel Gasoel total 1000litrus ho kombustivel Gazolina 2000Litrus, maibe realidade fornese deit 1,120 litru. Restu husi kombustivel refere, arguidu nain tolu ense tiha ba kareta sira.
Mesmu hanesan nee arguidu BdJ iha fali 28 Janeiru tinan 2014, ho pozisaun hanesan Direktor Lojistika Nasional kontinua asina iha invois hato husi kompania Ruvie Fuel Lda, kombustivel ho kuantidade 1000ltrs fornese ba PNTL UPF no 2000ltrs fornese ba PNTL UPF Oecusse ho total invois US$ 4,500.00 husi finansas PNTL.
Arguidu LLG no DM hetan kondenasaun, tanba kazu fan mina, akontese iha loron 10 fulan Maiu tinan 2014, fornese husi kompañia RUVIC Fuel.
Iha tinan 2014 arguidu BdJ entrega senha kombustivel ba arguidu LLG no DM hodi arguidu BdJ iha kunhesimentu katak arguidu LLG no DM sira atu fan ho total osan apuradu durante produsaun provas US$ 39, 235.00.
Atitude arguidu sira nian kaer toman wain hira halo kapturasaun sidadaun nain tolu, neebe maka uza kupon sosa mina husi arguidu LLG, no DM.
Iha buska no aprensaun iha LLG no DM hetan senha kombustivel iha sira nia uma, ho total 50 folhas ekivalen ho montante US$ 250.00.
Objetivu arguidu BdJ haruka arguidu LLG no DM fan senha kombustivel, atu nunee arguidu BdJ bele transfere ba iha Indonesia Surabaya, hodi selu nia oan nia eskola no selu arendamentu uma, inklui sosa tiket Dili-Bali-Surabaya.
Konsekuensia husi nee Estadu RDTL sofre prejuizu husi arguidu sira nia hahalok ho montante gazoel ho total (Fevereiru US$ 9, 818,07 nomos Marsu US$ 8,336.90) US$ 18, 154.97.
Tanba nee MP akuza arguidu BdJ, hanesan autor material ba Krime Pekulatu previstu iha artigu 295, no Krime trafiku de influensia 10/19.
Arguidu LLG hanesan autor material ba krime Pekulatu tuir artigu 295 husi Kodigu Penal ho forma kontinuadu.
Arguidu DM hanesan autor material, ba pratika krime Pekulatu artigu 295 husi Kodigu Penal ho forma kontinuadu.
Audiensia julgamentu nee prezide hosi Juiz koletivu Juiza Ercilia de Jesus, Ana Paula Fonseca, José Maria de Araujo, Ministeriu Publiku reprezenta husi Prokuradora Lidia Soares, arguidu sira hetan asistensia legal husi Advogadu Privadu, no Defensor Publiku.
(ter)
