DILI, STLTIMORLESTE.com – Eis Ministru Interior (MI), Longuinhos Monteiro neebe moras kurasaun iha fulan kotuk liu ba baixa iha Hospital Nasional Guido Valadares (HNGV), maibe transfere ba rai liur nee intervensaun husi Prezidente Republika (PR), Jose Ramos Horta, atu halao tratamentu lalais tanba moras grave.
Prezidente Komisaun F, Parlamentu Nasional (PN), Maria Gorumali Barreto hatete, kona-ba pasiente eis Ministru Interior (MI), Longuinhos Monteiro neebe transfere urjenti ba rai liu hodi halo tratamentu ba kurasaun.
“Hau atu dehan katak, laiha tratamentu ida espesial ba pasiente seluk ho pasiente Longuinhos Monteiro, ninia prosesu lao hanesan, nia tenke tuir hotu Junta Mediku, maibe tanba iha intervensaunn direita husi ita nia Prezidente Republika, José Ramos Horta, katak pasiente transfere ba rai liur ho Aviaun Charter neebe responsabilidade husi PR nian, laos mai husi Ministeriu Saude,” hatete Maria Gorumali Barreto ba jornalista sira iha HNGV, Bidau, Dili, Kinta (23/01/2025).
Nia hatutan, iha informasaun neebe husi Diretóra Ezekutivu HNGV katak, tuir Mediku Espesialista Kardiologia nian halo diagnosa hatudu katak, pasiente nee grave iha kurasaun, tanba nee presiza transfere lalais ba rai liur.
“Ita rona ema balu kestiona katak, transferensia ba nee, PR selu ho nia osan ka oinsa, nee PR mak bele responde ida nee, sei PR mak intervensaun hodi responsabilidade pasiente ba rai liur nee bele entrevista PR mak bele responde,” nia informa.
Iha fatin ketak, Veteranu Costantino Ximenes “Nehek” hatete, governu tenke fo atendimentu saude ba povu hanesan, labele haree liu ba membru governu no ba Veteranu sira mak importante liu.
Entretantu informasaun neebe jornalista STL rekolha iha terrenu katak, eis Ministru Interior, Longuinhos Monteiro baixa iha HNGV fulan kotuk liu ba, depois pasiente tuir rejistu iha Junta Mediku HNGV nian, maibe tanba deit sei prosesu naruk, Prezidente Republika, José Ramos Horta foti desizaun hodi trasferensia lalais ba rai liur, tanba pasiente labele kontinua halo tratamentu iha HNGV, maibe tenke transfere lalais ba rai liu hodi halo tratamentu ba kurasaun.
(jen)
