DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MO, tanba komete krime hasoru lezada DO.
Iha indisus sufisiente katak, iha loron 3 fulan Agusto 2025 iha Kampu Alor arguidu foti besi las odamatan, hodi baku ofendida nia ain kabun.
Arguidu halo ida nee, tanba ho kondisaun lanu.
Konsekuensia husi arguidu nia hahalok nee, halo lezada sente moras hodi ba hato keixa.
Arguida halo ho forma livre, hatene hela katak nia hahalok nee lei bandu maibe halo nafatin.
Tanba nee, Ministeriu Publiku akuza arguidu komete krime Violensia Domestika ho Forma Ofensa Integridade Fizika Simples, neebe previstu iha artigu 145 husi Kodigu Penal, konjuga ho lei Violensia Domestika numeru 07/2010 loron 07 fulan Dezembru.
Hatan ba faktus nee, arguidu deklara katak, faktus neebe konsta iha akuzasaun loos hotu.
Arguidu rekonese, baku duni lezada, tanba kondisaun lanu. Maibe momentu neeba sira diak malu kedan, arguidu mos arepende ba hahalok nee, hahu husi neeba mai to agora la iha tan problema ona.
Alende nee lezada deklara katak, arguidu laos bebeik lanu baku lezada, maibe ida nee foin primera vez.
Lezada rekonese, sira diak malu ona hahu husi neeba mai to agora la iha tan problema ona.
Rona tiha arguidu no lezada, Tribunal husu atu tama ba iha faze alegasaun.
Liu husi alegasaun Prokuradora Estajiada deklara katak, faktus neebe konsta iha akuzasaun provadu hotu. Tanba nee husu Tribunal atu aplika pena multa ba arguidu.
Alende nee, Defeza Henrique Mariz deklara katak, arguidu arepende ba nia hahalok, tanba nee aseita ho pedidu MP nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Estajiada nain ida, Ministeriu Publiku reprezenta husi Prokuradora estajiada, no arguidu hetan asistensia legal husi Defensor Publiku Henrique Mariz.
(ter)
