DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial DC (laen), neebe lori kadeira ai baku lezada (feen) ho inisial MB.
Tuir akuzasaun neebe Juiz prosesu Ersilia de Jesus lee sai iha loron Segunda (13/01/2025) katak, iha loron 4 fulan Fevereiru tinan 2024 haleu oras tuku 90:00 iha Metiaut Dili, arguidu DC lori kadera ai baku ho makaas dala rua, kona iha ofendida nia ulun fatuk no arguidu ameasa tan ofendida o sai mai liur sei ta mate o.
Konsekuensia direita husi agresaun fizika nee, ofendida hetan moras makaas iha ulun fatuk, kanek suku pontu 13 no raan sai barak.
Konsekuensia husi ameasa nee, ofendida sente tauk no labele determina nia aan ba haree nia familia, tanba ofendida koalia beibeik mak hodi mosu problema nee.
Arguidu halo ho forma livre, deliberada no konsientemente, hatene katak lori kadeira ai baku ho makaas dala rua kona iha ofendida nia ulun fatuk, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proebidu no punidu tuir lei penal.
Arguidu halo ho forma livre ho proposito konkretiza hodi utiliza expresaun neebe nia hatene katak, adekuadu hodi hamosu tauk ka la hakmatek ba lezada atu determina nia an.
Tanba nee, Ministeriu Publiku akuza arguidu komete krime Violensia Domestika ho forma Ofensa Integridade Fizika Simples neebe previstu iha artgu 145 hudi kodigu penal.
Hatan ba akuzasaun neebe iha, arguidu konfesa ba faktus katak, arguidu halo duni agresaun hasoru lezada, no nia motivu tanba deit lezada koalia barak.
Arguidu deklara, momentu neeba lezada husu ba arguidu atu lori lezada nia oan sira ba vizita lezada nia familia, maibe arguidu atu ba halo lia iha uma lisan, ho ida nee mak arguidu la hatan lezada ho nia oan sira ba.
Arguidu rekonhese lori duni kadera baku lezada, no ikus mai sira diak malu ona arguidu arepende tebes ba nia hahalok nee, no promete sei la halo tan iha futuru.
Iha sala julgamentu lezada mos haforsa tan akuzasaun neebe iha katak lezada hetan duni agresaun, no agora sira diak malu ona, la mosu tan problema ona.
Rona tiha ida nee, iha alegasaun Prokurador Napoliao da Silva husu Tribunal atu aplika pena multa US$ 45 ba arguidu. Enkuantu husi parte defeza haree katak, arguidu foin primera vez mai iha Tribunal husu atu aplika pena neebe kmaan ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Erisilia de Jesus, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Marsal Mascarinhas.
(ter)
